ವಚನಗಳು

೧
ಕೆಂಡದನುಭವ ಮೈಯ ಬೇಯಿಸಿತ್ತು
ಉಂಡನುಭವ ಉದರ ಹೊರೆಯಿತ್ತು
ಗಂಡನುಭವ ರಣದಿ ಜಯವ ತಂದಿತ್ತು
ಮಂಡನುಭವ ಜೀವನ್ಮುಕ್ತಿಯ ಕೆಡಿಸಿತ್ತು
ಅತಿಗೊಳಿಸಿದನುಭವ ತೃಪ್ತಿಗೆ ಕಪ್ಪಿಟ್ಟಿತ್ತು
ಹಿತಮಿತದನುಭವ ಭವವ ಗೆಲಿಸಿತ್ತಯ್ಯ
ಸೊಗಲ ಸೋಮೇಶ್ವರ

೨
ಸತ್ಯವಂತರೇ ನುಡಿಯಲಿ
ಎಡುವುತಿಹರಯ್ಯ
ಆಚರಿಪರೇ ನಡೆಯಲಿ ದುರಾಚಾರಿಗಳಾಗಿಹರಯ್ಯ
ವಿಚಾರಿಗಳೇ ವಾದದಿ
ಕುಯುಕ್ತಿಗಿಳಿದಿಹರಯ್ಯ
ದಾರಿತೋರ್ವ ಗುರುವೇ
ಬಟ್ಟೆಗೆಟ್ಟಿಹರಯ್ಯ
ಪಾಲಿಸಬೇಕಾದವರೇ
ನೇಮ ಮುರಿಯುತಿಹರಯ್ಯ
ಪೋಷಣೆ ಮಾಡಬೇಕಾದಾವರೇ
ಆಪೋಷಿಸುತಿಹರಯ್ಯ
ದಾನಿಸಬೇಕಿದ್ದ ದಾಸೋಹಿಗಳೇ ದರವೇಸಿಗಳಾಗಿಹರಯ್ಯ
ಇಂತ ತನು ಮನ ಧನಗೆಟ್ಟಿಹ
ಕಲಿಗಾಲದ ಕೆಸರಲಿ ಸಿಕ್ಕು ಹಲುಬಿ
ಭವವ ನೀಗಲು ಒದ್ದಾಡುತಿಹ ಬಡಜೀವವನೆಂತು ಪೊರೆವೆಯಯ್ಯ
ಸೊಗಲ ಸೋಮೇಶ್ವರ

೩

ಕಣ್ಸೆಳೆವ ಸೌಂದರ್ಯ ಸೃಜಿಸಿದೆ
ಅನುಭವಿಸುವಲ್ಲಿ ಜಿಪುಣನಾಗಿಬಿಟ್ಟೆ
ಸುಗಂಧ ಪರಿಮಳವ ಪಸರಿಸಿದೆ
ಸುವಾಸಿಸುವಲ್ಲಿ ನಾಸಿಕಗೆಡಿಸಿಬಿಟ್ಟೆ
ಕರ್ಣಾನಂದಕೆ ಗಾನಸುಧೆ ಹರಿದಿದೆ
ಕೇಳಿ ಸುಖಿಸಿ ಕರುಬುವಂತಾಗಿಬಿಟ್ಟೆ
ಇಳೆಯ ಬೆಳೆಯಲಿ ಹಲರುಚಿಗಳ ಭರಿಸಿದೆ
ಚಪ್ಪರಿಸಿ ಭೋಗಿಸುವಲ್ಲಿ ಸ್ವಾದಗೆಡಿಸಿಬಿಟ್ಟೆ
ಒಳಿತು ವಚಿಸುವ ಭವದನುಭಾವ ಬಿತ್ತಿದ
ನುಡಿದು ನಡೆವಲ್ಲಿ ಮನವಗೆಡಿಸಿಬಿಟ್ಟೆ
ಇಂತಪ್ಪ ಜಗದ ಸುಖಕೆ ಹುಟ್ಟು ಪಡೆದು
ಅತಿಯಾಗದ ಮಿತಭೋಗದಿ ಯೋಗಿಸಿ
ಭವನೀಗುವ ನರನೇ ನಿಜ ಶರಣನಯ್ಯ
ಸೊಗಲ ಸೋಮೇಶ್ವರ

” ನೀಲಾಂಬಿಕಾತನಯ”
*ಡಾ. ಗಜಾನಂದ ಸೊಗಲನ್ನವರ*
ಚಿಕ್ಕಬಾಗೇವಾಡಿ
9591308406