ಸಿಂದಗಿ: ರಾಜ್ಯದಲ್ಲಿ ಕರೋನಾ ಮೂರನೇ ಅಲೆ ಬರುವ ಮನ್ಸೂಚನೆಯಿದ್ದು ಇದರ ಮುಂಜಾಗೃತೆಗಾಗಿ ಕೋವಿಡ್ ಹೋರಾಟದಲ್ಲಿ ಸೈನಿಕರ ರೂಪದಲ್ಲಿ ಕಾರ್ಯನಿರ್ವಹಿಸುತ್ತಿರುವ ಮಾಧ್ಯಮ ಮಿತ್ರರು ಹಾಗೂ ಆಶಾ ಕಾರ್ಯಕರ್ತೆಯರು ಸರಕಾರದ ಯಾವುದೇ ಫಲಾಪೇಕ್ಷೆಯಿಲ್ಲದೆ ಸಮಾಜ ಸೇವೆ ಎಂದು ಭಾವಿಸಿ ಕಾರ್ಯನಿರ್ವಹಿಸಿದ್ದು ಇಂತಹ ಆಶಾ ಕಾರ್ಯಕರ್ತೆಯರನ್ನು ಗುರುತಿಸಿ ಸಂಗಮ್ ಸಂಸ್ಥೆ ಮೆಡಿಕಲ್ ಕಿಟ್ ನೀಡುತ್ತಿರುವುದು ಶ್ಲಾಘನೀಯ ಎಂದು ತಾಪಂ ಇಓ ಕೆ.ಹೊಂಗಯ್ಯ. ಹೇಳಿದರು.
ಪಟ್ಟಣದ ಹೊರವಲಯದಲ್ಲಿರುವ ಲೋಯಲಾ ಆಂಗ್ಲ ಮಾದ್ಯಮ ಶಾಲೆಯ ಆವರಣದಲ್ಲಿ ಸಂಗಮ ಸಮಗ್ರ ಗ್ರಾಮೀಣ ಅಭಿವೃದ್ದಿ ಕೇಂದ್ರದ ವತಿಯಿಂದ ರೂ 10 ಸಾವಿರ ಬೆಲೆಯುಳ್ಳ 360 ಆಶಾ ಕಾರ್ಯಕರ್ತೆಯರಿಗೆ ವಿಶೇಷ ಮೆಡಿಕಲ್ ಕಿಟ್ ಗಳನ್ನು ವಿತರಣೆ ಮಾಡಿ ಅವರು ಮಾತನಾಡಿದರು.
ಕಿರಿಯ ಆರೋಗ್ಯಾಧಿಕಾರಿ ಡಾ. ಪಿ.ವೈ.ಚೌಡಕಿ ಅವರು ಮಾತನಾಡಿ, ಆರೋಗ್ಯ ಇಲಾಖೆಯ ಮೂಲ ಸ್ತಂಭವಾಗಿರುವ ಆಶಾ ಕಾರ್ಯಕರ್ತೆಯರು ತಮ್ಮ ಜೀವದ ಹಂಗು ತೊರೆದು ಜನರ ನಿಂದನೆಗಳನ್ನು ಎಣಿಸದೇ ಸೇವೆ ಸಲ್ಲಿಸುತ್ತಿರುವ ಕಾರ್ಯ ಅಮೋಘವಾಗಿದ್ದು ಸಂಗಮ ಸಮಗ್ರ ಗ್ರಾಮೀಣ ಅಭಿವೃದ್ಧಿ ಕೇಂದ್ರ ಸಂಸ್ಥೆಯಿಂದ ಆಶಾ ಕಾರ್ಯಕರ್ತೆಯರಿಗೆ ಆರೋಗ್ಯ ಹಿತದೃಷ್ಟಿಯಿಂದ ವಿಶೇಷ ಮೆಡಿಕಲ್ ಕಿಟ್ ವಿತರಣೆ ಮಾಡುತ್ತಿರುವದು ಅಭಿನಂದಾರ್ಹವಾಗಿದೆ ಎಂದರು.
ಸಿಸ್ಟರ್ ಅನಿತಾ ಡಿಸೋಜಾ ಮಾತನಾಡಿ, ಸುಮಾರು ರೂ.10 ಸಾವಿರ ಮೌಲ್ಯದ ಒಳಗೊಂಡ ಮೆಡಿಕಲ್ ಕಿಟ್ ಇದಾಗಿದ್ದು ಈ ಕಿಟ್ ನಲ್ಲಿ ಆಕ್ಸಿ ಮೀಟರ್, ಪಲ್ಸ್ ಮೀಟರ್, ಎನ್95 6 ಮಾಸ್ಕ್ 6 ಫೇಸ್ ಶೀಲ್ಡ್, ಥರ್ಮಾ ಮೀಟರ್, ಶುಗರ್ ತಪಾಸಣೆ ಯಂತ್ರ ಹೀಗೆ ಅನೇಕ ಮೆಡಿಕಲ್ ಕಿಟ್ ಗಳನ್ನು 360 ಆಶಾ ಕಾರ್ಯಕರ್ತೆಯರಿಗೆ ವಿತರಿಸಲಾಗುತ್ತಿದ್ದು ಇದರ ಸದುಪಯೋಗವಾಗಬೇಕು ಯಾರಾದರು ಮಾರಾಟ ಮಾಡುವುದಾಗಲಿ, ಅಥವಾ ಉಪಯೋಗ ಮಾಡದೇ ಇರುವುದು ಗಮನಕ್ಕೆ ಬಂದರೆ ಸೂಕ್ತ ಕ್ರಮ ಜರುಗಿಸಲಾಗುವುದು ಅಲ್ಲದೆ ಗ್ರಾಮೀಣ ಭಾಗದಲ್ಲಿ ಆಶಾ ಕಾರ್ಯಕರ್ತೆಯರ ಸಹಾಯಕ್ಕಾಗಿ ಸಂಗಮ ಸಂಸ್ಥೆಯ ಕಾರ್ಯಕರ್ತರು ಕಾರ್ಯನಿರ್ವಹಿಸಲಿದ್ದು ಅವರಿಗೂ ಸಹಕಾರ ನೀಡುವಂತೆ ಕೇಳಿಕೊಂಡರು.
ಈ ಸಂದರ್ಭದಲ್ಲಿ ಡಾ.ಎಂ ಆರ್ ಬಡಿಗೇರ ಸೇರಿದಂತೆ ತಾಲೂಕಿನ ಮಲಗಾಣ, ಮೋರಟಗಿ, ಸಿಂದಗಿ ಆರೋಗ್ಯ ಕೇಂದ್ರದ ಆಶಾ ಕಾರ್ಯಕರ್ತೆಯರು, ಸಂಗಮ ಸಂಸ್ಥೆಯ ಮಲಕಪ್ಪ, ಆನಂದ, ಪುಂಡಲೀಕ ಭಾಗಿದ್ದರು.
ನಾಗಮ್ಮ ಯಮ್ಮಿ ಪ್ರಾರ್ಥಿಸಿದರು. ಒಂದನೇ ಫಾದರ ರೋಬಿನ್ ಡಿಸೋಜಾ ಸ್ವಾಗತಿಸಿದರು. ಲೋಯಲಾ ಸಂಸ್ಥೆಯ ವ್ಯವಸ್ಥಾಪಕ ಸಿರಿಯನ್ ಡಿಸೋಜಾ ವಂದಿಸಿದರು.