spot_img
spot_img

ಮಹಾನ ಸಂತ ಸೇವಾಲಾಲರ ಜಯಂತಿ ಇಂದು

Must Read

ಜನನ:15.02.1739
ಮರಣ: 04.12.1806

ಮಹಾಸಂತ, ಚಿಂತಕ ಶ್ರೀ ಸೇವಾಲಾಲರ 282 ನೇ ಜಯಂತಿ
ಬಾಲಬ್ರಹ್ಮಚಾರಿಯಾಗಿ ತಪಸ್ಸು, ಧ್ಯಾನ ಮತ್ತು ಭಕ್ತಿ ಮೂಲಕ ಆಧ್ಯಾತ್ಮವನ್ನು ಅಪ್ಪಿಕೊಂಡು, ದೇವರನ್ನು ಒಲಿಸಿಕೊಂಡು, ತಮ್ಮ ಜನಾಂಗದ ಸೇವೆಯನ್ನು ಮಾಡಿದ ಮಹಾನ್‌ ಹಿತಚಿಂತಕರು.
ಲಂಬಾಣಿಗರಲ್ಲಿ ಸೇವಾಲಾಲರು ಬಹುದೊಡ್ಡ ಸಾಧುಪುರುಷ. ಬಾಲಬ್ರಹ್ಮಚಾರಿಯಾಗಿ ತಪಸ್ಸು, ಧ್ಯಾನ ಮತ್ತು ಭಕ್ತಿ ಮೂಲಕ ಆಧ್ಯಾತ್ಮವನ್ನು ಅಪ್ಪಿಕೊಂಡು, ದೇವರನ್ನು ಒಲಿಸಿಕೊಂಡು, ತಮ್ಮ ಜನಾಂಗದ ಸೇವೆಯನ್ನು ಮಾಡಿದ ಮಹಾನ್‌ ಹಿತಚಿಂತಕರು. ದಾರ್ಶನಿಕರು.

ಆಧ್ಯಾತ್ಮದ ಮೂಲಕವಾಗಿ ಉಪದೇಶಗಳನ್ನು ನೀಡಿ, ಸನ್ಮಾರ್ಗದತ್ತ ಕೊಂಡೊಯ್ದವರು. ತಮ್ಮ ಬುಡಕಟ್ಟಿನ ಜನರಲ್ಲಿ ಧೈರ್ಯ, ಸಾಹಸ, ಆತ್ಮಸ್ಥೈರ್ಯ ಮತ್ತು ಆತ್ಮಾಭಿಮಾನವನ್ನು ಮೂಡಿಸಿದವರು. ಸೇವಾಲಾಲರ ಬೋಧನೆ ಮತ್ತು ಚಿಂತನೆಗಳು ಬಂಜಾರ ಜನಾಂಗದಲ್ಲಿ ಇಂದು ಏಕತೆಯನ್ನುಂಟುಮಾಡಿರುವುದು ಸ್ಪಷ್ಟ. ಜನರಲ್ಲಿರುವ ಮಿಥ್ಯಾಚರಣೆಗಳನ್ನು ತೊಲಗಿಸಿ, ಅವರ ಬದುಕನ್ನು ಉದ್ಧರಿಸಿದ ಕಾಲಜ್ಞಾನಿ ಅವರು. ಇಂದು ಬಂಜಾರರು ಸಾಂಸ್ಕೃತಿಕ ನೆಲೆಯಲ್ಲಿ ತನ್ನ ಅಸ್ಮಿತೆಯನ್ನು ಗುರುತಿಸಿಕೊಳ್ಳಲು ಈ ಮಹಾನುಭಾವರ ಸತ್ಕಾರ್ಯಗಳೇ ಕಾರಣ. ಹೀಗಾಗಿ ಬಂಜಾರ ಸಮುದಾಯದಲ್ಲಿ ಸೇವಾಲಾಲರು ವೀರನಾಗಿ, ವಿರಾಗಿಯಾಗಿ, ಒಬ್ಬ ಶ್ರೇಷ್ಠ ದಾರ್ಶನಿಕನಾಗಿ ಮತ್ತು ಸಾಂಸ್ಕೃತಿಕ ನಾಯಕನಾಗಿ ಚಿರಸ್ಥಾಯಿಯಾಗಿದ್ದಾರೆ.

ಸೇವಾಲಾಲರ ಕಾಲ, ಜನನ, ವೃತ್ತಾಂತ, ಮರಣ ಮತ್ತು ಬದುಕಿನ ಬಗೆಗೆ ಈಗಾಗಲೇ ಸಾಕಷ್ಟು ಚರ್ಚೆಗಳು ನಡೆದಿದೆ. ಚಾರಿತ್ರಿಕ ಆಧಾರಗಳು ಇಲ್ಲದ್ದರಿಂದ ಯಾವುದೇ ಖಚಿತವಾದ ಮಾಹಿತಿಗಳು ನಮಗೆ ದೊರೆಯುವುದಿಲ್ಲ. ಅವರ ಕಥನ ಗೀತೆಗಳು, ಲಾವಣಿಗಳು, ಭಜನೆ-ಗೀತೆ ಹಾಗೂ ಕೆಲವು ಭೌಗೋಳಿಕ ಆಧಾರ ಆಧರಿಸಿ ಇದೀಗ ಶಿವಮೊಗ್ಗ ಜಿಲ್ಲೆಯ ಹೊನ್ನಾಳಿ ತಾಲೂಕಿನ ಸೂರಗೊಂಡನಕೊಪ್ಪವೇ ಸೇವಾಲಾಲರ ಜನ್ಮಸ್ಥಳವೆಂದು ನಿರ್ಧರಿಸಲಾಗಿದೆ.

ಸೇವಾಲಾಲರ ಪೂರ್ವಜರು ಉತ್ತರ ಭಾರತದಿಂದ ವಲಸೆ ಬಂದವರು. ರಾಣಾ ಪ್ರತಾಪನ ಮರಣಾ ನಂತರ ಕಾಡುವಾಸಿಗಳಾಗಿದ್ದ ಬಂಜಾರರು, ಮೊಘಲರ ಸೈನ್ಯಗಳೊಂದಿಗೆ ದಕ್ಷಿಣಕ್ಕೆ ಬಂದರು. ರಾಮಸಿ ರಾಮಾವತ್‌ (ರಾಥೋಡ್‌) ಗೋತ್ರದ ರಾಮ್‌ಜೀ ನಾಯಕರದು ಬಹುದೊಡ್ಡ ಸಂಸಾರ. ಅವರ ಹಿರಿಯ ಮಗ ಭೀಮಾ ನಾಯಕ, ಆತನ ಪತ್ನಿ ಧರ್ಮಿಣಿ ಬಾಯಿ. ಮದುವೆಯಾಗಿ 12 ವರ್ಷದ ಬಳಿಕ ಹುಟ್ಟಿದ ಮಗನೇ ಸೇವಾಲಾಲ.

ಸೇವಾಲಾಲರಿಗೆ 12 ವರ್ಷ ತುಂಬಿದಾಗ ಮರಿಯಮ್ಮ ತನ್ನ ಷರತ್ತನ್ನು ಈಡೇರಿಸಬೇಕೆಂದು ಧರ್ಮಿಣಿ ಬಾಯಿಯ ಕನಸಿನಲ್ಲಿ ಬಂದು ಸೇವಾಲಾಲರನ್ನು ತನ್ನ ಸೇವೆಗೆ ಬಿಡಬೇಕೆಂದು ಒತ್ತಾಯಿಸುತ್ತಾಳೆ. ಅದಕ್ಕೆ ಧರ್ಮಿಣಿಯು ಒಪ್ಪದೇ ಹೋದಾಗ ನೇರವಾಗಿ ಸೇವಾಲಾಲನನ್ನು ತನ್ನ ಭಕ್ತನಾಗಬೇಕೆಂದು, ತನ್ನ ಜೊತೆಗೆ ಬರಬೇಕೆಂದು ಕೇಳಿದಾಗ ಅವರೂ ಭಕ್ತನಾಗಲು ತಿರಸ್ಕರಿಸುತ್ತಾನೆ. ತಾನು ಪರಮಾತ್ಮನ ಸೇವಕನೆಂದು, ಮರಿಯಮ್ಮಳ ಸೇವೆ ಮಾಡಲಾರನೆಂದು ಹಠ ಹಿಡಿಯುತ್ತಾರೆ. ಇದರಿಂದ ಅವಮಾನಿತಳಾದ ಮರಿಯಮ್ಮ ಸೇವಾಲಾಲನ ಕುಟುಂಬವನ್ನು ನಾಶ ಮಾಡುವುದರ ಮೂಲಕ ಪರಿಪರಿಯಾಗಿ ಕಾಡಿಸುತ್ತಾಳೆ. ಇದರಿಂದ ಹತಾಶರಾದ ಸೇವಾಲಾಲರು ಅನಿವಾರ್ಯವಾಗಿ ಜಗನ್ಮಾತೆಯ ಭಕ್ತನಾಗಲು ಒಪ್ಪಿಕೊಳ್ಳುತ್ತಾರೆ.

ಕಾಲಗತಿಯಲ್ಲಿ ಹತ್ತಾರು ವರ್ಷಗಳವರೆಗೆ ಮರಿಯಮ್ಮನ ಸೇವೆಗೆ ತೊಡಗಿಸಿಕೊಂಡು ಸೇವಾಲಾಲರು ಮಹಾನ್‌ ಸಾಧಕರಾಗಿ ಮೆರೆಯುತ್ತಾರೆ. ಐತಿಹ್ಯದ ಪ್ರಕಾರ, ಮರಿಯಮ್ಮ ಒಡ್ಡುವ ಕಠಿಣಾತಿ ಕಠಿಣ ಪರೀಕ್ಷೆಯನ್ನು ಗೆದ್ದು ಕೊನೆಗೆ ಸೇವಾಲಾಲರು ಅಮರನಾಗುತ್ತಾನೆ. ದೇಹಾಂತ್ಯವಾದ ಮೇಲೆ ಮಹಾರಾಷ್ಟ್ರದ ವಾಸಿಮ್‌ ಜಿಲ್ಲೆಯ ಅಕ್ಕೋಲ ತಾಲೂಕಿನ ಸಮೀಪದಲ್ಲಿರುವ ಪೊಹರಾಗಢ ಎಂಬಲ್ಲಿ ಅಂತ್ಯಸಂಸ್ಕಾರ ನಡೆಯಿತು. ಈಗ ಅಲ್ಲಿ ಸೇವಾಲಾಲ ಮತ್ತು ಜಗನ್ಮಾತೆ ಮರಿಯಮ್ಮಳ ಬೃಹತ್‌ ಮಂದಿರ ಕಟ್ಟಿದ್ದು, ಅದು ಸಮಸ್ತ ಬಂಜಾರರ ಪುಣ್ಯಕ್ಷೇತ್ರವಾಗಿದೆ.

ಸೇವಾಲಾಲನು ಕಾಲಗತಿಯಲ್ಲಿ ಮಹಾಸಾಧಕನಾಗಿ, ವೀರ ವೈರಾಗಿಯಾಗಿ, ಜಗನ್ಮಾತೆಯ ಭಕ್ತನಾಗಿ, ಭೂಲೋಕದ ಸಮಸ್ತ ಭಕ್ತಾದಿಗಳಿಗೆ ಗುರುವಾಗಿ, ಸಂತನಾಗಿ, ತನ್ನನ್ನು ನಂಬಿದ ಭಕ್ತಕೋಟಿಯ ಸಂಸಾರವನ್ನು ಉದ್ಧರಿಸುತ್ತಾ, ಅಲ್ಲಲ್ಲಿ ಗುರುಪೀಠ, ಶಕ್ತಿಪೀಠಗಳನ್ನು ಮತ್ತು ಮಠ-ಮಂದಿರಗಳನ್ನು ಕಟ್ಟುತ್ತಾ, ಜಗನ್ಮಾತೆಯ ದೈವೀ ಲೀಲೆಗಳನ್ನು ಪ್ರಚುರಪಡಿಸುತ್ತಾ, ಇಡೀ ಸಮುದಾಯದಲ್ಲಿ ದೈವೀ ಸ್ವರೂಪಿಯಾಗಿ ನೆಲೆ ನಿಂತರು. ಕರ್ನಾಟಕವನ್ನು ಒಳಗೊಂಡಂತೆ ದೇಶದ ಇತರೆ ಪ್ರದೇಶಗಳಿಗೆ ಪರ್ಯಟನೆ ಕೈಗೊಂಡು, ಭಕ್ತ ಜನರ ಕಷ್ಟ-ಕಾರ್ಪಣ್ಯಗಳನ್ನು, ದುಃಖ-ದುಮ್ಮಾನಗಳನ್ನು ಪರಿಹರಿಸುತ್ತಾ, ಲೋಕ ಕಲ್ಯಾಣ ಮಾಡುತ್ತಾ, ಆಧ್ಯಾತ್ಮ ಬೋಧನೆಯನ್ನು ಮಾಡುತ್ತಾ, ದೇಶ ಸಂಚಾರವನ್ನು ಕೈಗೊಳ್ಳುತ್ತಾರೆ.

ಸೇವಾಲಾಲರ ದೈವೀ ಶಕ್ತಿಯನ್ನು ತಿಳಿದು ನಿಜಾಮನು ಅವನನ್ನು ಅರಮನೆಗೆ ಕರೆದು ಪಾದಪೂಜೆಯನ್ನು ಮಾಡಿ, ಕಪ್ಪ-ಕಾಣಿಕೆಯನ್ನು ನೀಡಿ, ಹೈದರಾಬಾದ್‌ನ ಕೇಂದ್ರಸ್ಥಾನದಲ್ಲಿ ಅವರ ತಂಡಕ್ಕಾಗಿ ನೆಲೆಯೂರಲು ಒಂದಿಷ್ಟು ಜಾಗವನ್ನು ಅರ್ಪಿಸುತ್ತಾನೆ. ನಿಜಾಮನು ಬಂಜಾರರಿಗೆ ನೀಡಿದ ಆ ಪ್ರದೇಶ ಬಂಜಾರ ಹಿಲ್ಸ್‌ ಇಂದು ಮಹಾರಾಜ ಗಂಜ್‌ ಎಂದು ಕರೆಯಲ್ಪಟ್ಟಿದೆ.

ಲಂಬಾಣಿಗರಲ್ಲಿ ಪ್ರಚಲಿತವಿರುವ ಕಥನ ಗೀತೆ, ಲಾವಣಿ, ಭಜನೆ ಗೀತೆಗಳಲ್ಲಿ ಸೇವಾಲಾಲರ ಕುರಿತು ಕೆಲವು ಲೀಲೆಗಳನ್ನು ಪ್ರಸ್ತುತಪಡಿಸುತ್ತಾರೆ. ಅದರ ಸತ್ಯಾಸತ್ಯತೆಗಳನ್ನು ಪರಾಮರ್ಶಿಸದ ಲಂಬಾಣಿಗರು ಸೇವಾಲಾಲರ ಲೀಲೆಗಳನ್ನು ತುಂಬಾ ಭಾವುಕರಾಗಿ ಗುಣಗಾನ ಮಾಡುತ್ತಾರೆ. ಸತ್ಯಾಸತ್ಯತೆಗಳು ಏನೇ ಇರಲಿ, ಮರಿಯಮ್ಮನ ವರಪ್ರಸಾದದಿಂದ ಜನ್ಮಪಡೆದ ಸೇವಾಲಾಲರಲ್ಲಿ ಕೆಲವು ಚಮತ್ಕಾರಿಕ ಅಂಶಗಳು ಆವಿರ್ಭಸಿದ್ದವು. ಅವರ ಬದುಕಿನುದ್ದಕ್ಕೂ ಮರಿಯಮ್ಮ ನೆರಳಾಗಿ ನಿಂತು ಅವರನ್ನು ಶಕ್ತಿವಂತನನ್ನಾಗಿ ಪರಿವರ್ತಿಸಿದ್ದರು. ಹೀಗಾಗಿ ಸೇವಾಲಾಲರು ಮೆರೆದ ಲೀಲೆಗಳ ಹಿಂದೆ ಜಗನ್ಮಾತೆಯ ಕೃಪಾಕಟಾಕ್ಷ ಇರುವುದು ಸ್ಪಷ್ಟವಾಗಿದೆ.

ಸೇವಾಲಾಲರ ಪ್ರವಚನಗಳು

ಸೇವಾಲಾಲರು ಯೋಗಿಯಾಗಿ, ಮಹಾಸಂತರಾಗಿ ಲೋಕಕಲ್ಯಾಣಕ್ಕಾಗಿ ದೇಶಾದ್ಯಂತ ಸಂಚರಿಸಿ, ತನ್ನನ್ನು ನಂಬಿದ ಭಕ್ತರನ್ನು ಉದ್ಧಾರಪಥದತ್ತ ಮುನ್ನಡೆಸಿದ್ದಾರೆ. ಈ ವಿಚಾರಗಳು ಎಂದೂ ಬರಹ ರೂಪದಲ್ಲಿ ನಮಗೆ ದೊರಕದಿದ್ದರೂ, ಲಂಬಾಣಿಗರ ಮೌಖಿಕ ಪರಂಪರೆಯಲ್ಲಿರುವ ಅವರ ಕಥನ ಗೀತೆ, ಭಜನಾ ಗೀತೆ, ಲಾವಣಿಗಳಲ್ಲಿ ಹೇರಳವಾಗಿ ಪ್ರಸ್ತಾಪವಾಗಿರುವುದನ್ನು ಕಾಣುತ್ತೇವೆ. ಮನುಕುಲಕ್ಕೆ ಸೇವಾಲಾಲರು ಬೋಧಿಸಿದ ಕೆಲವು ಹಿತ ವಚನಗಳು-ಉಪದೇಶಗಳು :

  1. ಮನುಷ್ಯ ತಾನು ಭೂಮಿಗೆ ಬಂದ ಕಾರಣವನ್ನು ತಿಳಿದುಕೊಳ್ಳಬೇಕು. ಮೊದಲು ತಾನಾರು ತನ್ನ ಮುಂದಿನ ಕೆಲಸಗಳೇನು ಎಂದು ಯೋಚಿಸಿ, ಬದುಕಿನಲ್ಲಿ ನಿರ್ಮಲವಾದ ನಡೆನುಡಿಯನ್ನು ಅನುಸರಿಸಬೇಕು.
  2. ಪರಮ ಪಾವನವಾಗಿರುವ ನಡೆನುಡಿಯನ್ನು ಇಟ್ಟುಕೊಂಡು ನಿರ್ಮಲ ಭಾವದಿಂದ ಮನಸ್ಸನ್ನು ತಿಳಿಗೊಳಿಸಿ, ಹರಿಹರಬ್ರಹ್ಮರು ಒಂದೇ ಎಂದು ಭಾವಿಸುತ್ತಾ, ಪಂಚೇಂದ್ರಿಯಗಳನ್ನು ಕಟ್ಟುತ್ತಾ, ವಿಷಯಗಳಲ್ಲಿ ಮನಸ್ಸನ್ನು ಬೆರೆಯದಂತೆ, ವಿವೇಕಯುತವಾಗಿ ವಿಚಾರಮಂಥನ ಮಾಡಿಕೊಳ್ಳಬೇಕು.
  3. ಹುಟ್ಟು-ಸಾವಿನ ನಡುವೆ ತಾನು ಮಾಡಿದ ಕೆಲಸಗಳೇನು? ಪುಣ್ಯ ಪಾಪವನ್ನು ಬಿಟ್ಟು ಪರ ಹಿತ ಕಾರ್ಯವನ್ನು ಮಾಡಿ, ಹಿಂದೆ ಮಾಡಿದ ಕೆಟ್ಟ ಕರ್ಮಾದಿಗಳನ್ನು ತಿಳಿಯುವುದರಿಂದ ಮನಸ್ಸು ಭಾವಕ್ಕೆ ಸ್ಪಂದಿಸಿ, ಕರ್ಮವು ಕೂಡಿಕೊಳ್ಳುತ್ತದೆ.
  4. ಮಾನವ ತನ್ನ ಬದುಕಿನ ಬಗೆಗೆ ನಿತ್ಯ ಯೋಚಿಸಬೇಕು. ಹಸಿವು, ತೃಷೆ, ಶೋಕ, ಮೋಹ ಮತ್ತು ಮಮಕಾರಗಳನ್ನು ತಿಳಿದುಕೊಳ್ಳಬೇಕು. ಅಳಿದು ಹೋಗುವ ದೇಹದ ಸುಖವನ್ನು ತಿಳಿಯಲು ನಾನಾರೆಂಬ ಮೋಹವು ಗಳಿಸಿಕೊಳ್ಳುವ ಭೋಗ-ಭಾಗ್ಯಗಳೆಲ್ಲವೂ ಬರೀ ಸುಳ್ಳು.
  5. ಹುಟ್ಟಿ ಬಂದ ಈ ದೇಹದ ಸುಖಗಳಾದ ನಿದ್ರೆ, ಆಹಾರ, ಭಯ, ಮೈಥುನ, ಮೊದಲಾದುವುಗಳನ್ನು ಬಿಟ್ಟು, ಏನಿದೆ ? ಪಶುಗಳಂತೆ ಹುಟ್ಟಿ, ಮುಪ್ಪಾಗಿ ಸಾಯುತ್ತೇವೆ.
  6. ಮನಸ್ಸಿನ ಮೋಹ, ಭ್ರಾಂತಿ, ಮನದಾಸೆ, ಅವೆಲ್ಲವನ್ನೂ ತಾಯಿ ಮರಿಯಮ್ಮನಿಗೆ ಅರ್ಪಿಸಿದಲ್ಲಿ, ಆ ತಾಯಿ ತಿಳಿದವರಿಗೆ ಸಕಲ ಸೌಭಾಗ್ಯ, ಸಂತಸವನ್ನು ಹಾಗೂ ನಿಜ ಸುಖವನ್ನು ಕೇಳದಿದ್ದರೂ ದಯಪಾಲಿಸುವಳು.
  7. ನಾನು’ ಎಂಬುದು ಅಳಿದ ಮೇಲೆ ಈ ಜಗವು ಅಂಬೆಯ ಆಟವು. ಹಸಿವು, ನೀರಡಿಕೆ, ನಿದ್ರೆ ಇಲ್ಲದೆ ಏಕಾಂತದಲ್ಲಿ ಕುಳಿತು ಚಿಂತಿಸಿದರೆ ಈ ಜಗದಾಟವೆಲ್ಲವೂ ನಮ್ಮೊಳಗೆ ಕಾಣಿಸುವುದು. ಭಾವವು ಒಳ-ಹೊರಗೆ ಒಂದಾಗಿದ್ದರೆ ವಿಷಯದ ಆಸೆಯು ತಿಳಿಯುತ್ತದೆ. ನಾನು-ನನ್ನದು ಎಂಬ ಮೋಹವು ಮನದಲ್ಲಿ ಸುಳಿಯದು.
  8. ನಂಬಿದವರಿಗೆ ಮಾತೆಯಾಗಿರುವ, ನಂಬದವರಿಗೆ ಮಾಯೆ ಎನ್ನಿಸಿರುವ, ನಂಬಿ ಹಂಬಲಿಸುವವರ ಮನೆ-ಮನದಲ್ಲಿ ಆ ತಾಯಿ ಕುಳಿತಿರುವಳು. ತಾಯಿ ಜಗದಂಬೆಯನ್ನು ನೆನೆಯುತ್ತಾ ಮನೆ-ಮನಗಳನ್ನು ಶುಚಿಗೊಳಿಸಿಕೊಳ್ಳಿರಿ.
  9. ಜನ್ಮಾಂತರದ ವಾಸನೆಯನ್ನು ಸುಟ್ಟು ಹಾಕಿ, ಆಸೆ-ವಿಷಯವನ್ನು ನಷ್ಟ ಮಾಡುವುದರಿಂದ ದೇವಿಯಲ್ಲಿ ಐಕ್ಯತೆಯನ್ನು ಹೊಂದುತ್ತೇವೆ. ದೇವಿಯ ಪಾದಸ್ಪರ್ಶದಿಂದ ಭಜಿಸಲು ಅಷ್ಟಸಿದ್ಧಿಗಳು ಓಡಿಬಂದು ಕರುಣೆಯಿಂದ ಕಷ್ಟಜೀವಿಗಳ ಕೈಡಿದು ಸಲಹುವಳು.
  10. ಜೀವನ್ಮುಖಿಯ ಸಾಧನೆಗಾಗಿ ಮನುಕುಲವು ಪ್ರೀತಿಯಿಂದ ಹೃದಯ, ಮನಸ್ಸು, ಭಾವಗಳನ್ನು ಪರಿಶುದ್ಧಗೊಳಿಸುತ್ತಾ, ಸುಜ್ಞಾನ ತತ್ವಗಳನ್ನು ಅರ್ಥೈಸಿಕೊಳ್ಳಬೇಕೆಂದು ಸೇವಾಲಾಲ ಅವರು ಹೇಳಿದ್ದಾರೆ.

ಕೃಪೆ: ವೃತ ಪತ್ರಿಕೆ ಲೇಖನ
ಶ್ರೀ ಮತಿ ವಿಜಯಲಕ್ಷ್ಮಿ ಗುತ್ತೇದಾರ.
ಸ.ಕಿ.ಪ್ರಾ.ಶಾ.ಪಂಚಶೀಲ ನಗರ ಭೂಸನೂರ.

- Advertisement -
- Advertisement -

Latest News

ಉಂಡು ಮಲಗಿದ ಮೇಲೂ ಗಂಡ ಹೆಂಡಿರ ಜಗಳ !

ಸಂಸಾರದ ಬಂಡಿ ಸರಾಗವಾಗಿ ಸಾಗಬೇಕಾದರೆ ಗಂಡ ಹೆಂಡತಿ ಎನ್ನುವ ಎರಡು ಗಾಲಿಗಳು ಸಮಸಮವಾಗಿ ಚಲಿಸಬೇಕು. ಎರಡೂ ಗಾಲಿಗಳಿಗೆ ಪ್ರಾಧಾನ್ಯತೆಯಿದೆ. ಒಂದು ಹೆಚ್ಚು ಒಂದು ಕಡಿಮೆ ಇಲ್ಲ....
- Advertisement -

More Articles Like This

- Advertisement -
close
error: Content is protected !!