ಬೀದರ: ಹೈ ವೋಲ್ಟೆಟ್ ವಿದ್ಯುತ್ ಇರುವ ತಂತಿ ಟ್ರಾನ್ಸ್‌‌ಫಾರ್ಮ‌ರ್‌ಗೆ ತಗುಲಿ ಉಂಟಾದ ಶಾರ್ಟ್ ಸರ್ಕ್ಯೂಟ್ ನಿಂದ ಸುಮಾರು 15 ಮನೆಗಳಲ್ಲಿನ ವಿದ್ಯುತ್ ಪರಿಕರಗಳಿಗೆ ಹಾನಿಯುಂಟಾಗಿರುವ ಪ್ರಕರಣ ನಡೆದಿದೆ.
ಬೀದರ ತಾಲೂಕಿನ ಹೊನ್ನಡ್ಡಿ ಗ್ರಾಮದಲ್ಲಿ ಈ ಘಟನೆ ನಡೆದಿದ್ದು ಹಲವು ಮನೆಗಳಲ್ಲಿನ ಫ್ಯಾನ್, ಟಿವಿ, ಪ್ರಿಡ್ಜ್ ಸೇರಿದಂತೆ ಹಲವು ವಸ್ತುಗಳಿಗೆ ಶಾರ್ಟ್ ಸರ್ಕ್ಯೂಟ್‌ನಿಂದ ಹಾನಿಯಾಗಿದೆ. ಅಷ್ಟೇ ಅಲ್ಲದೆ ಹಾಸಿಗೆ ದಿಂಬುಗಳೂ ಸುಟ್ಟು ಕರಕಲಾಗಿವೆ.
೧೧ ಸಾವಿರ ವ್ಯಾಟ್‌ನ ವಿದ್ಯುತ್ ತಂತಿ ೨೫೦ ವ್ಯಾಟ್‌ನ ಟ್ರಾನ್ಸ್‌ಫಾರ್ಮರ್ ಗೆ ತಗುಲಿ ಅನಾಹುತ ಸಂಭವಿಸಿದೆ. ಹಲವು ಬಾರಿ ತಂತಿ ಸರಿಪಡಿಸುವಂತೆ ಮನವಿ ಮಾಡಿಕೊಂಡರೂ ಕ್ಯಾರೆ ಎನ್ನದ ವಿದ್ಯುತ್ ಅಧಿಕಾರಿಗಳಿಂದಾಗಿ ಈ ಅನಾಹುತ ಸಂಭವಿಸಿದೆಯೆಂಬುದಾಗಿ ಸಾರ್ವಜನಿಕರು ಆರೋಪಿಸಿದ್ದಾರೆ.
ಅದೃಷ್ಟವಶಾತ್ ಯಾವುದೇ ಪ್ರಾಣ ಹಾನಿ ಸಂಭವಿಸಿಲ್ಲ.
ವರದಿ: ನಂದಕುಮಾರ ಕರಂಜೆ, ಬೀದರ
