ಲೇಖನ : ಸಾಲುತಿಲ್ಲವೆ ಸಮಯ ಸಾಲುತಿಲ್ಲವೆ, , , ,

ಸಮಯ ನೋಡಲು ಸಮಯವಿಲ್ಲ. ಯಾವುದಕ್ಕೂ ಪುರುಸೊತ್ತಿಲ್ಲ. ದಿನದ ೨೪ ಗಂಟೆ ಸಾಲುತ್ತಿಲ್ಲ. ಕುಟುಂಬ, ಮನರಂಜನೆ,ವಿಶ್ರಾಂತಿ, ನೆಮ್ಮದಿಯಂತೂ ಕನಸಿನ ಮಾತಾಗಿದೆ ಅನ್ನೋ ಮಾತುಗಳು ದಿನಾಲು ಕಿವಿಗೆ ಬೀಳುತ್ತಲೇ ಇರುತ್ತವೆ. ಸಮಯ ಮತ್ತು ಸಮುದ್ರದ ಅಲೆ ಯಾರಿಗಾಗಿಯೂ ಕಾಯುವುದಿಲ್ಲ ಎನ್ನುವ ಮಾತನ್ನು ನಾವೆಲ್ಲ ಕೇಳಿದ್ದೇವೆ. ಹಾಗೆ ನೋಡಿದರೆ ಸಮಯ ನಿರ್ವಹಣೆಯೇ ಜೀವನ ಅನ್ನುವಷ್ಟು ಸಮಯ ಮಹತ್ವದ್ದಾಗಿದೆ. ಒಮ್ಮೆ ಕಳೆದು ಹೋದರೆ ಮರಳಿ ಪಡೆಯಲಾಗದಂತಹ ಸಂಪತ್ತು. ಅದಕ್ಕೆ ಸಮನಾದುದು ಯಾವುದು ಇಲ್ಲ. ಜಗತ್ತಿನ ಅತಿ ಶ್ರೀಮಂತ ವ್ಯಕ್ತಿ ಏನೆಲ್ಲವನ್ನೂ ಕೊಳ್ಳಬಹುದು ಆದರೆ ಸಮಯವನ್ನು ಕೊಳ್ಳಲಾರ. ಯಾರ ಕೈಗೂ ಸಿಗದೇ ಓಡುವ ವಸ್ತು ಎಂದರೆ ಸಮಯ. ಅದರ ನಿರ್ವಹಣೆ ಗೊತ್ತಿರುವವನು ಅಸಾಧ್ಯವಾಗಿರುವುದನ್ನು ಸಾಧ್ಯವಾಗಿಸಬಲ್ಲ. ಜೀವನದ ಎಲ್ಲ ಕ್ಷೇತ್ರಗಳಲ್ಲಿ ಉತ್ತಮವಾಗಿ ಕಾರ್ಯ ನಿರ್ವಹಿಸಲು ಸಮಯದ ಮೌಲ್ಯವನ್ನು ಅರ್ಥ ಮಾಡಿಕೊಳ್ಳಬೇಕು.

ಸಮಯ ನಿರ್ವಹಣೆ ಎಂದರೆ, , , ,?
ಸರಿಯಾದ ಚಟುವಟಿಕೆಗಳಿಗೆ ಸರಿಯಾದ ಸಮಯವನ್ನು ನಿಗದಿಪಡಿಸುವುದು. ಸೀಮಿತ ಸಮಯದಲ್ಲಿ ನೀವು ಹೊಂದಿರುವ ಸಮಯದ ಲಾಭವನ್ನು ಪಡೆಯುವ ಕಲೆ. ‘ಕಪ್ಪೆಯನ್ನು ತಿನ್ನುವುದು ನಿಮ್ಮ ಕೆಲಸವಾಗಿದ್ದರೆ, ಬೆಳಿಗ್ಗೆ ಅದನ್ನು ಮಾಡುವುದು ಉತ್ತಮ. ಎರಡು ಕಪ್ಪೆಗಳನ್ನು ತಿನ್ನುವುದು ನಿಮ್ಮ ಕೆಲಸವಾಗಿದ್ದರೆ ಮೊದಲು ದೊಡ್ಡದನ್ನು ತಿನ್ನುವುದು ಉತ್ತಮ.’ ಸಮಯ ನಿರ್ವಹಣೆಯ ಕುರಿತಾಗಿ ಮಾರ್ಕ್ ಟ್ವೇನ್ ಹೇಳಿದ ಈ ಮಾತು ನಿಜಕ್ಕೂ ಅರ್ಥಪೂರ್ಣವೆನಿಸುತ್ತದೆ.

ಸಮಯ ನಿರ್ವಹಣೆ ಏಕೆ ಮುಖ್ಯ, , , , ?
ಬ್ರಹ್ಮಾಂಡದಲ್ಲಿ ಎಲ್ಲವೂ ಸಮಯದಿಂದ ಪ್ರಭಾವಿತವಾಗಿದೆ. ನಿಮ್ಮ ಪ್ರೀತಿಪಾತ್ರರೊಂದಿಗೆ ಗುಣಮಟ್ಟದ ಸಮಯವನ್ನು ಕಳೆಯಲು ಮಧುರ ಸಂಬಂಧಗಳನ್ನು ನಿರ್ಮಿಸಲು ಸಹಾಯ ಮಾಡುತ್ತದೆ. ಸ್ವಯಂ ಶಿಸ್ತನ್ನು ಸುಧಾರಿಸುತ್ತದೆ. ನಿರ್ಧಾರ ತೆಗೆದುಕೊಳ್ಳುವ ಕೌಶಲ್ಯವನ್ನು ವೃದ್ಧಿಸುತ್ತದೆ. ಕೌಶಲ್ಯಗಳಿಂದ ಕೆಲಸದಲ್ಲಿ ಹೆಚ್ಚು ನುರಿತವರಾಗುತ್ತೀರಿ. ಹೊಂದಿರುವ ಹೆಚ್ಚಿನ ಕೌಶಲ್ಯಗಳು ಹೆಚ್ಚು ಅವಕಾಶಗಳನ್ನು ತಂದು ಸುರಿಯುತ್ತವೆ. ಸಮಯವನ್ನು ಯೋಜಿಸುವ ಮೂಲಕ ಹೆಚ್ಚು ಮೌಲ್ಯಯುತರಾಗುತ್ತೀರಿ.
ಸಮಯ ಕಳೆದುಕೊಳ್ಳದಿರಲು ಬಯಸುವಿರಾ?
ಜಗತ್ತಿನಲ್ಲಿ ಅಸ್ತಿತ್ವದಲ್ಲಿರುವ ಅತ್ಯಂತ ನಿಗೂಢ ಅಂಶಗಳಲ್ಲಿ ಸಮಯವೂ ಒಂದಾಗಿದೆ. ಕ್ಷಣಗಳು ಗಂಟೆಗಳಾಗಿ ಗಂಟೆಗಳು ದಿನಗಳಾಗಿ ದಿನಗಳು ವಾರಗಳಾಗಿ ವಾರಗಳು ತಿಂಗಳುಗಳಾಗಿ ತಿಂಗಳುಗಳು ವರ್ಷಗಳಾಗಿ ಕಣ್ಮುಂದೆ ಉರುಳಿ ಹೋಗುತ್ತವೆ. ಸಮಯ ಅಷ್ಟು ಬೇಗ ಸರಿದಿದ್ದು ಗೊತ್ತಾಗುವುದೇ ಇಲ್ಲ. ನಿಮ್ಮ ಸಮಯವನ್ನು ಪೂರ್ಣವಾಗಿ ಉಪಯೋಗಿಸಿ ಏಕೆಂದರೆ ಜೀವನವು ನಿಮಗೆ ಮತ್ತೆ ಹಾಗೆ ಮಾಡಲು ಅವಕಾಶವನ್ನು ನೀಡುವುದಿಲ್ಲ.ನಿಮ್ಮ ಸಮಯವನ್ನು ಕಳೆದುಕೊಳ್ಳದಿರಲು ನೀವು ಬಯಸಿದರೆ, ನೀವು ಸಮಯವನ್ನು ಸರಿಯಾಗಿ ನಿರ್ವಹಿಸಿ.ನಿಮ್ಮ ಸಮಯವನ್ನು ಹೆಚ್ಚಿಸಲು ಮತ್ತು ಪ್ರತಿದಿನ ಹೆಚ್ಚಿನದನ್ನು ಸಾಧಿಸಲು, ನೀವು ಉತ್ಪಾದಕ ಅಭ್ಯಾಸಗಳನ್ನು ಬೆಳೆಸಿಕೊಳ್ಳಬೇಕು. ಮತ್ತು ನಿಮ್ಮ ಸಮಯವನ್ನು ಗೌರವಿಸಬೇಕು. ಏಕೆಂದರೆ ಸಮಯಕ್ಕೆ ಸರಿಯಾಗಿ ಕೆಲಸ ಮಾಡುವ ಮತ್ತು ಅವರ ಸಮಯವನ್ನು ಗೌರವಿಸುವ ಜನರು ಜೀವನದಲ್ಲಿ ಎಂದೂ ಮುಜುಗರಕ್ಕೊಳಗಾಗುವುದಿಲ್ಲ. ದೈನಂದಿನ ಜೀವನದಲ್ಲಿ ಸಮಯವನ್ನು ಉಳಿಸುವುದು ಮತ್ತು ಹೆಚ್ಚು ಮುಖ್ಯವಾದ ಆದ್ಯತೆಗಳ ಮೇಲೆ ಕೇಂದ್ರೀಕರಿಸುವುದು ಹೇಗೆ ಎಂದು ಯೋಚಿಸುತ್ತಿದ್ದೀರಾ ಅದಕ್ಕೆ ಇಲ್ಲಿವೆ ಕೆಲವು ಸಹಕಾರಿ ಸಲಹೆಗಳು

ವೇಳಾಪಟ್ಟಿ
ನಿಮ್ಮ ಕೆಲಸ ಮತ್ತು ಕುಟುಂಬದ ಬದ್ಧತೆ, ವೃತ್ತಿಪರ ಜವಾಬ್ದಾರಿಗಳನ್ನು ಸಂಯೋಜಿಸುವ ದಿನಚರಿಯನ್ನು ರಚಿಸುವುದು ಮತ್ತು ಅನುಸರಿಸುವುದು ದೈನಂದಿನ ಜೀವನದಲ್ಲಿ ಸಮಯವನ್ನು ಉಳಿಸುವ ಮೊದಲ ಮಾರ್ಗವಾಗಿದೆ. ದಿನಚರಿಯು ಕೆಲಸವನ್ನು ಸರಳಗೊಳಿಸುತ್ತದೆ. ಮತ್ತು ವಿಳಂಬವನ್ನು ನಿವಾರಿಸುತ್ತದೆ. ವೇಳಾಪಟ್ಟಿಯನ್ನು ಸಮಯದ ಚೌಕಟ್ಟಿನೊಂದಿಗೆ ತಯಾರಿಸಿ ಅದರಲ್ಲಿ ಅಗತ್ಯ ಮತ್ತು ಮಹತ್ವದ ಕೆಲಸಗಳಿಗೆ ಆದ್ಯತೆ ನೀಡುವುದರಿಂದ ಸಮಯ ಉಳಿಸಲು ಸಾಧ್ಯ. ಪ್ರತಿದಿನ ನಿಮ್ಮ ಕೆಲಸದ ಸಮಯವನ್ನು ಗಂಟೆಯ ಆಧಾರದ ಮೇಲೆ ಪ್ರಯತ್ನಿಸಿ.

ಬೇಡ ಬಹುಕಾರ್ಯ
ಬಹುಕಾರ್ಯಕ್ಕೆ ನೀವು ‘ಇಲ್ಲ’ ಎಂದು ಹೇಳಿ. ಬಹುಕಾರ್ಯವನ್ನು ಪ್ರಾರಂಭಿಸಿದರೆ ಯಾವುದೇ ಒಂದು ಕಾರ್ಯದ ಮೇಲೆ ಕೇಂದ್ರೀಕರಿಸಲು ಸಾಧ್ಯವಿಲ್ಲ. ಕೆಲಸಗಳು ಅಪೂರ್ಣವಾಗಿ ಉಳಿಯಬಹುದು. ಕೆಲಸಗಳು ಬಾಕಿ ಉಳಿಯಬಹುದು. ಬಹುಕಾರ್ಯವು ಹೀಗಾಗಿ ನೀವು ಅನುತ್ಪಾದಕರಾಗಲು ಕಾರಣವಾಗಬಹುದು. ಅಂಕಿ ಅಂಶಗಳ ಪ್ರಕಾರ ಬಹುಕಾರ್ಯವು ಉತ್ಪಾದಕತೆಯಲ್ಲಿ ೪೦%ರಷ್ಟು ಕುಸಿತಕ್ಕೆ ಕಾರಣವಾಗುತ್ತದೆ. ಬಹುಕಾರ್ಯಗಳಲ್ಲಿ ನೀವು ತ್ವರಿತವಾಗಿ ಮತ್ತು ಪರಿಣಾಮಕಾರಿಯಾಗಿ ಮಾಡುವ ಭರವಸೆ ನೀಡುತ್ತೀರಿ ಆದರೆ ಕಾರ್ಯಗಳನ್ನು ಬದಲಾಯಿಸುವುದರಿಂದ ನಿಮ್ಮ ಗಮನವನ್ನು ಬೇರೆಡೆ ತಿರುಗಿಸಬಹುದು ಮತ್ತು ಅವುಗಳಲ್ಲಿ ಯಾವುದಾದರೂ ಒಂದಕ್ಕೆ ನಿಮ್ಮನ್ನು ಸಂಪೂರ್ಣವಾಗಿ ಸಮರ್ಪಿಸುವ ನಿಮ್ಮ ಸಾಮರ್ಥ್ಯಕ್ಕೆ ಅಡ್ಡಿಯಾಗಬಹುದು.

ವ್ಯಾಕುಲತೆಯಿಂದ ಮುಕ್ತಿ
ನೀವು ಎದುರಿಸುವ ಗೊಂದಲಗಳು ನಿಮ್ಮ ಕೆಲಸದ ಪ್ರಗತಿಗೆ ಅಡ್ಡಿಯಾಗಬಹುದು. ಕಾರ್ಯಕ್ಷಮತೆಯನ್ನು ನಿಧಾನಗೊಳಿಸಬಹುದು. ಗೊಂದಲಗಳು ಯಾವುದೇ ರೂಪದಲ್ಲಿರಬಹುದು ನೀವು ವಿಚಲಿತರಾಗಬಹುದು. ಆದ್ದರಿಂದ ಕೆಲಸದ ವಾತಾವರಣ ಶಾಂತವಾಗಿರುವುದನ್ನು ಖಚಿತಪಡಿಸಿಕೊಳ್ಳಿ. ಇದರಿಂದ ಮನಸ್ಸು ನಿರಾಳವಾಗುತ್ತದೆ ಕೆಲಸ ಬೇಗ ಮುಗಿಯುತ್ತದೆ. ಸಮಯ ಉಳಿಯುತ್ತದೆ.

ನಿಯಮಿತ ಸ್ಥಳ
ಕೆಲಸ ಮಾಡುವಾಗ ಬೇಕಾಗಿರುವ ವಸ್ತುಗಳನ್ನು ಮಾತ್ರ ಹೊಂದಿದ್ದರೆ ಕೆಲಸದ ಮೇಲೆ ಕೇಂದ್ರೀಕರಿಸುವುದು ಸುಲಭ. ನಿಯಮಿತವಾಗಿ ಬಳಸುವ ವಸ್ತುಗಳನ್ನು ಒಂದೇ ಸ್ಥಳದಲ್ಲಿ ಇರಿಸುವ ಅಭ್ಯಾಸವನ್ನು ಬೆಳೆಸಿಕೊಳ್ಳಿ. ವಸ್ತುಗಳ ನಿಯೋಜನೆಯನ್ನು ಸರಳಗೊಳಿಸಿದಾಗ ಅಸ್ತವ್ಯಸ್ತತೆಯ ಸಮಯವನ್ನು ಉಳಿಸಬಹುದು.

ಒಂದೇ ರೀತಿ ಕೆಲಸ
ವಿವಿಧ ರೀತಿಯ ಕೆಲಸಗಳ ನಡುವೆ ನಿರ್ಧಿಷ್ಟವಾದ ಒಂದೇ ರೀತಿಯ ಕಾರ್ಯಗಳನ್ನು ಒಂದೇ ಸಮಯದಲ್ಲಿ ಸಂಯೋಜಿಸುವುದು ಕಾರ್ಯ ಆದೇಶಗಳ ನಡುವಿನ ವ್ಯರ್ಥ ಸಮಯವನ್ನು ಉಳಿಸುವುದು. ಉದಾಹರಣೆಗೆ ನಿಮಗೆ ಬೇಕಾದ ವಸ್ತುಗಳ ಪಟ್ಟಿಯನ್ನು ಮಾಡಿ ಎಲ್ಲವನ್ನೂ ಖರೀದಿಸಲು ಒಂದೇ ಸಲ ಹೋಗುವುದು.

ಡಿಜಿಟೈಜ್ ಮಾಡಿ
ಡಿಜಿಟಲ್ ದುನಿಯಾದಲ್ಲಿ ವಾಸಿಸುವ ನಾವು ಅದರಲ್ಲಿರುವ ಎಲ್ಲ ಪ್ರಯೋಜನಗಳನ್ನು ಪಡೆದುಕೊಳ್ಳಬೇಕು. ಆನ್ ಲೈನ್ ಬಿಲ್ ಪಾವತಿಸಿ. ಆನ್ ಲೈನ್ ಶಾಪಿಂಗ್ ಮಾಡಿ. ಇ ಮೇಲ್ ಕಳುಹಿಸಿ. ವೈಸ್ ಮೆಸೇಜ್ ಕಳುಹಿಸಿ. ಹೆಚ್ಚುವರಿಯಾಗಿ ವರ್ಚುವಲ್ ವೇದಿಕೆಯನ್ನು ಬಳಸಿಕೊಂಡು ನೀವು ಸಾಧಿಸಬಹುದಾದ ವ್ಯಾಪಕ ಶ್ರೇಣಿಯ, ಸಮಯವನ್ನು ಉಳಿಸುವ ಸಾಕಷ್ಟು ವಿಷಯಗಳಿವೆ ಕಾಯುವ ಕೆಲಸಗಳಿಗೆ ಹೋದಾಗ ಮೊಬೈಲ್‌ನ್ನು ಉತ್ಪಾದಕ ಕೆಲಸಗಳಿಗೆ ಬಳಸಿಕೊಳ್ಳಬೇಕು. ಇಲ್ಲವೇ ಸಾಧ್ಯವಾದರೆ ಮಾಡಬೇಕಾದ ಕೆಲಸಗಳನ್ನು ತೆಗೆದುಕೊಂಡು ಹೋಗಿ.

ಕಲಿಯಿರಿ
ಅನುಭವ ಉತ್ತಮ ಶಿಕ್ಷಕ ಹಾಗಂತ ಎಲ್ಲವನ್ನೂ ನೀವೇ ಅನುಭವಿಸಿ ಕಲಿಯಲು ಸಮಯವಿಲ್ಲ. ಬೇರೆಯವರು ಖರೀದಿಸಿದ ಸೇವೆಗಳನ್ನು ಕೇಳಿ ಖರೀದಿಸಿ ಅಥವಾ ಉತ್ಪನ್ನಗಳ ಸಾಧಕ-ಬಾಧಕಗಳಾಗಿ ಗೆಳೆಯರನ್ನು ಕೇಳಿ. ಯಶಸ್ವಿ ಜನರ ವಿಧಾನಗಳನ್ನು ನಕಲಿಸಿ. ವಿಫಲವಾದ ಮಾರ್ಗಗಳನ್ನು ತಪ್ಪಿಸಿ. ಅವಶ್ಯಕತೆಯಿಲ್ಲದ ಸಭೆ ಸಮಾರಂಭಗಳಲ್ಲಿ ಭಾಗವಹಿಸಬೇಡಿ. ನಿಮ್ಮ ಅಗತ್ಯವಿಲ್ಲದಿದ್ದರೆ ಅಂತಹ ಕೆಲಸಗಳಿಗೆ ಬೇರೆಯವರನ್ನು ನೇಮಿಸಿ. ಬಹುತೇಕ ಮುಗಿದ ಕೆಲಸಗಳನ್ನು ತಕ್ಷಣವೇ ಮುಗಿಸಿಬಿಡಿ.ಕಾರ್ಯ ಯೋಜನೆ ಮಾಡಲು ದಿನದ ಕೊನೆಯಲ್ಲಿ ಸಮಯವನ್ನು ನಿಗದಿಪಡಿಸಿ. ಗೆಳೆಯರಿಗೆ ಇಲ್ಲ ಎಂದು ಹೇಳುವುದು ಕಷ್ಟ. ಆದರೆ ಇದು ಅವಶ್ಯಕ. ಸಮಯವನ್ನು ತಿನ್ನುವ ವಿನಂತಿಗಳನ್ನು ಗೌರವಯುತವಾಗಿ ತಿರಸ್ಕರಿಸಿ. ಸಾಮಾಜಿಕ ಜಾಲತಾಣಗಳಲ್ಲಿ ನಿಮ್ಮ ಸಮಯ ಮಿತಿಗೊಳಿಸಿ.
ಕೊನೆ ಹನಿ
ಸಮಯ ವ್ಯರ್ಥ ಮಾಡುವವರು ಜೀವನವನ್ನೇ ವ್ಯರ್ಥ ಮಾಡಿಕೊಂಡಂತೆ. ಸಮಯದ ಮೌಲ್ಯ ತಿಳಿಯದವರು ಸಾಧಕರಾಗುವುದಂತೂ ದೂರವೇ ಉಳಿಯಿತು. ಸಮಯದ ಮಹತ್ವ ತಿಳಿಯದೇ ಇರುವುದಕ್ಕೆ ಜೀವನದಲ್ಲಿ ಅನೇಕ ಸಮಸ್ಯೆಗಳನ್ನು ಎದುರಿಸಬೇಕಾಗುವುದು ಎಂಬುದು ವಿಚಿತ್ರವೆನಿಸಿದರೂ ಸತ್ಯ. ಜೀವನದ ಅಸ್ತವ್ಯಸ್ತವಾಗಿರುವ ಸ್ವಭಾವದ ಮಧ್ಯೆ ಮಾಡಬೇಕಾದ ಕೆಲಸಗಳ ಪಟ್ಟಿಯಲ್ಲಿರುವ ಎಲ್ಲವನ್ನೂ ಮಾಡುವುದು ಅಸಾಧ್ಯವಾಗಬಹುದು. ನಮ್ಮೊಂದಿಗೆ ಅಥವಾ ನಾವು ಪ್ರೀತಿಸುವವರೊಂದಿಗೆ ಸಮಯ ಕಳೆಯುವುದನ್ನು ಲಘುವಾಗಿ ತೆಗೆದುಕೊಂಡರೆ ಜೀವನ ನರಕವೆನಿಸುವುದು ಆದ್ದರಿಂದ ಈ ಸಲಹೆಗಳನ್ನು ಪಾಲಿಸೋಣ ಸಾಲುತಿಲ್ಲವೆ ಸಮಯ ಸಾಲುತಿಲ್ಲವೆ ಎಂದು ಗೊಣುಗುವುದನ್ನು ತಪ್ಪಿಸೋಣ. ಜೀವನವನ್ನು ಸ್ವರ್ಗವಾಗಿಸಿಕೊಳ್ಳೋಣ ಅಲ್ಲವೇ?
=============================================================

ಜಯಶ್ರೀ.ಜೆ. ಅಬ್ಬಿಗೇರಿ
ಇಂಗ್ಲೀಷ್ ಉಪನ್ಯಾಸಕರು
ಬೆಳಗಾವಿ ೯೪೪೯೨೩೪೧೪೨