ಅನಸೂಯ ಜಾಗೀರದಾರ ಗಜಲ್ ಗಳು

ಇತ್ತೀಚಿನ ದಿನಗಳಲಿ ವಾದ ಮಾಡಲಾರೆ ಸುಮ್ಮನಿದ್ದುಬಿಡುತ್ತೆನೆ

ಕಾಗೆ ಬಿಳಿಯೆಂದವರಿಗೆ ಸಾಕ್ಷ್ಯ ನೀಡಲಾರೆ ಸುಮ್ಮನಿದ್ದುಬಿಡುತ್ತೇನೆ

ಅವರದೇ ಜಗತ್ತು ಕೂಪ ಮಂಡೂಕಗಳು ಎಲ್ಲೆಡೆಯೂ ತುಂಬಿರುವರು
ಸುಖಾ ಸುಮ್ಮನೆ ತಣ್ಣೀರ ಎರಚಿ ಕೊಳ್ಳಲಾರೆ
ಸುಮ್ಮನಿದ್ದುಬಿಡುತ್ತೇನೆ

ಒಂದೇ ಸಮನೆ ರಂಪ ರಾದ್ಧಾಂತ ಪ್ರತಿ ವಿಷಯಕೂ ಕ್ಯಾತೆ ತೆಗೆಯುವರು
ಹಾದಿಯ ಗರವ ಮನೆಗೆ ಎಳೆದು ತರಲಾರೆ ಸುಮ್ಮನಿದ್ದುಬಿಡುತ್ತೇನೆ

ವಾದ ವಿವಾದವಾಗಿ ನ್ಯಾಯಕ್ಕೆಡೆಯಾಗಿ ಕಣ್ಣೀರು ಕೋಡಿ ಹರಿಯಬಹುದು
ಶಕ್ತಿ ಸಮಯವ ಹೀಗೆ ಅಪವ್ಯಯ ಮಾಡಲಾರೆ ಸುಮ್ಮನಿದ್ದುಬಿಡುತ್ತೇನೆ

ಅರಿಷಡ್ವರ್ಗಗಳ ಗೋಡೆಗಳ ದಾಟಿ ನಡೆಯಬೇಕಿದೆ ಕ್ಷಣಿಕ ಬದುಕಿನಲಿ ಅನು
ಜ್ಯೋತಿ ಬೆಳಗಿಸಿ ನಡೆವೆ ಬೆಂಕಿ ಹಚ್ಚಲಾರೆ ಸುಮ್ಮನಿದ್ದುಬಿಡುತ್ತೇನೆ

ನನ್ನನ್ನು ಹೊರಗಿಟ್ಟು ನೋಡುತಿರುವೆ ಏಕೋ
ಅಪನಂಬಿಕೆ ಉಯ್ಯಾಲೆ ತೂಗುತಿರುವೆ ಏಕೋ

ದೇಹಗಳು ಒಂದಾಗುವುದು ದೊಡ್ಡ
ಮಾತೇನಲ್ಲಬಿಡು
ಹೃದಯ ಬೆಸುಗೆಗೆ ಮೀನ ಮೇಷ ಎಣಿಸುತಿರುವೆ ಏಕೋ

ನಮ್ಮೀರ್ವರ ಪ್ರಣಯ ಪಯಣವಿದು ಮುಕ್ತಾಯ ಅನ್ನುವುದಿದೆಯೆ
ಮೊಗೆದಷ್ಟು ಪ್ರೀತಿ ಸೆಲೆಯ ಶಂಕಿಸುತಿರುವೆ ಏಕೋ

ಅದೇನು ರಹಸ್ಯವೋ ಎದೆಗೂಡಿನಲಿ ಬಚ್ಚಿಟ್ಟು ನೋವು ಉಣ್ಣುತಿರುವೆ
ನೋವು ನಲಿವು ಸಮಪಾಲೆಂದು ಮರೆತಿರುವೆ ಏಕೋ

ನಡೆದ ದಾರಿ ಸಿಂಹಾವಲೋಕನ ಆಗಲಿ ನಮ್ಮ ಬಾಳ ಯಾನದಲಿ
ಅನುಳ ಪ್ರೇಮ ತಿಳಿದೂ ತಿಳಿಯದಂತಿರುವೆ ಏಕೋ

ನಿನ್ನ ಮರೆಯಬೇಕೆಂದೆ ಆಗುತ್ತಿಲ್ಲವೇಕೆ
ರೆಪ್ಪೆ ಅಗಲಿಸಬೇಕೆಂದೆ ಆಗುತ್ತಿಲ್ಲವೇಕೆ

ನೋವಿನಲಿ ಒದ್ದಾಡುತಿದೆ ಈ ಹೃದಯ
ಮನವ ಒಡೆಯಬೇಕೆಂದೆ ಆಗುತ್ತಿಲ್ಲವೇಕೆ

ಸಲೀಸಾಗಿ ಕಡ್ಡಿತುಂಡಾಗಿಸಿ ಏನೂ ಇಲ್ಲವೆಂದೆ
ಅಂದದ್ದನ್ನು ಆಚರಿಸಬೇಕೆಂದೆ ಆಗುತ್ತಿಲ್ಲವೇಕೆ

ನನ್ನೊಲವ ಒರತೆ ತುಂಬಿ ತುಳುಕಾಡುತಿತ್ತು
ಪಸೆ ಬತ್ತಿಸಿ ಒಣಗಿಸಬೇಕೆಂದೆ ಆಗುತ್ತಿಲ್ಲವೇಕೆ

ಸುಂದರ ಮಧುರ ಪದಗಳ ಕವಿತೆ ಹೆಣೆದಿದ್ದೆ
ಪದಗಳ ಚದುರಿಸಬೇಕೆಂದೆ ಆಗುತ್ತಿಲ್ಲವೇಕೆ

ಅವನೊಳಗಿನ ನನ್ನ ಛಾಯೆಯನು ಅದೆಂತು ಬಿಡಿಸಿಕೊಳ್ಳುವುದು
ಉತ್ತರ ಕಂಡುಕೊಳ್ಳಬೇಕೆಂದೆ ಆಗುತ್ತಿಲ್ಲವೇಕೆ

ಪ್ರೀತಿಗೆ ಅಲ್ಲಿ ಜೋರು ಜುಲುಮಿ ಇರಲೇ ಇಲ್ಲ ಅನು
ನನ್ನಂತೆ ಉರಿವ ಶಮೆಯ ಆರಿಸಬೇಕೆಂದೆ ಆಗುತ್ತಿಲ್ಲವೇಕೆ

ಅನಸೂಯ ಜಹಗೀರದಾರ