ರೇಷ್ಮಾ ಕಂದಕೂರ,ಮಂಡಲಗಿರಿ ಪ್ರಸನ್ನ……
ಹಸಿವಿನಿಂದ ಕಂಗೆಟ್ಟವರ ತೊಳಲಾಟ ನೋಡದಾಗಿದೆ
ಕೃಶ ದೇಹದ ಅಧೋಗತಿಯ ಪರಿಸ್ಥಿತಿ ನೋಡದಾಗಿದೆ
ಕಮರಿದೆ ಭರವಸೆಯ ಬೆಳಕು ಮಂದಾಗ್ನಿಯಲಿ
ಹಣೆಬರಹದ ಕ್ರೂರತನ ಮದವೇರಿದನು ನೋಡದಾಗಿದೆ
ತುತ್ತಿನ ಚೀಲ ತುಂಬಿಸಲು ಕಗ್ಗಂಟಾಗಿ ಹೋಗಿದೆ
ಆ ದೇವನ ದೂಷಿಸುತ ದಿನ ದೂಡುವದನು ನೋಡದಾಗಿದೆ
ತಿಂದು ತೇಗಿ ಬಿಸಾಕುವ ಜನಕೆ ತಿಳಿಯಬಾರದೇ
ಕೊಳ್ಳುಬಾಕ ಮನೋಭಾವದಿ ಮೆರೆಯುವವರ ನೋಡದಾಗಿದೆ
ಪರಿಹಾರಕೆ ರೇಷಿಮೆಯ ಮನ ಮರುಗಿ ತಡಕಾಡಿದೆ
ಪಿಷ್ಟ ಹೊತ್ತು ಕುಚೇಷ್ಟೆ ಮಾಡುವವರ ನೋಡದಾಗಿದೆ.
ರೇಷ್ಮಾ ಕಂದಕೂರ
ಶಿಕ್ಷಕಿ ಸಿಂಧನೂರ
ಗಜಲ್
ಆ ಮಳೆಗೆ ಕನಸುಗಳು ಕುಡಿ ಒಡೆಯಬಹುದೆಂದು ಕಾಯುತಿರುವೆ
ಮೊಳಕೆ ಗಿಡವಾಗಿ ಹೂ-ಹಣ್ಣು ಬಿಡಬಹುದೆಂದು ಕಾಯುತಿರುವೆ
ನಿತ್ಯಬದುಕಿನ ಜಂಜಾಟಗಳಿಗೆ ತಂಪೆರೆವ ಸುಖದ ಕಾತರತೆ
ಕಷ್ಟಗಳ ಕೊಳೆ ಕೊಚ್ಚಿ ಹೋಗಬಹುದೆಂದು ಕಾಯುತಿರುವೆ
ದುಃಖ-ದುಮ್ಮಾನಗಳ ತೆಕ್ಕೆಗೆ ಹಾಕಿಕೊಂಡು ಸಾಗುವ ನಿರೀಕ್ಷೆ
ನದಿ-ಕಡಲು ಸೇರಿ ಸಮಾಧಾನ ತರಬಹುದೆಂದು ಕಾಯುತಿರುವೆ
ಸೋನೆಮಳೆಗೆ ಎದೆಯೊಳಗೆ ಹಕ್ಕಿಗಳು ಗೂಡುಕಟ್ಟುವ ತವಕ
ಹೃದಯ ಕೋಗಿಲೆ ಇಂಪಾಗಿ ಉಲಿಯಬಹುದೆಂದು ಕಾಯುತಿರುವೆ
ಮಧುಮಾಸದುತ್ಸಾಹ ಉಸಿರುಸಿರಲಿ ತುಂಬಿ ಉಲ್ಲಾಸಗೊಂಡತೆ `ಗಿರಿ’
ಬಂಜರೆದೆ ಹದಗೊಂಡು ನಾಳೆಗೆ ಅರಳಬಹುದೆಂದು ಕಾಯುತಿರುವೆ
ಮಂಡಲಗಿರಿ ಪ್ರಸನ್ನ ರಾಯಚೂರು