ಕಾಡಿನಲ್ಲಿ ಬಾಳುವಾಸೆ ನನ್ನದು
ದಟ್ಟವಾದ ಕಾಡಿನಲ್ಲಿ
ಪುಟ್ಟದಾದ ಮನೆಯ ಕಟ್ಟಿ
ಚಂದದಿಂದ ಬಾಳಬೇಕು
ಎನುವ ಆಸೆ ನನ್ನದು.
ಗಡ್ಡೆ-ಗೆಣಸು, ಜೊತೆಗೆ ಜೇನು
ಹಣ್ಣು ಹಂಪಲವನ್ನು ಸವಿದು
ಹರಿವ ತೊರೆಯ ತಿಳಿಯನೀರು ಕುಡಿವ ಆಸೆ ನನ್ನದು.
ಪ್ರಾಣಿ-ಪಕ್ಷಿ ಜೊತೆಗೆ ಕೂಡಿ
ಸ್ನೇಹ ,ಪ್ರೀತಿ, ಮಮತೆ ತೋರಿ
ಬೆರೆತು ಕೂಡಿ ಆಡಬೇಕು
ಎಂಬ ಆಸೆ ನನ್ನದು.
ಹಚ್ಚಹಸಿರ, ಸ್ವಚ್ಛ ಉಸಿರ
ಪುಷ್ಪಗಂಧ ಸವಿದು ನಿತ್ಯ
ಋಷಿಯ ಬದುಕು ಪಡೆಯಬೇಕು
ಎನುವ ಆಸೆ ನನ್ನದು.
ಕ್ರೂರ-ಸಾಧು ಭೇದವಳಿಸಿ
ಎಲ್ಲ ಜೀವಿ ಬಳಗದಲ್ಲಿ
ಸಾಮರಸ್ಯ ಬೆಳೆಸಬೇಕು
ಎನುವ ಆಸೆ ನನ್ನದು.
ಕಾಡನಾಶ ಮಾಡುತಿರುವ
ದುರುಳರನ್ನು ತಡೆದು ಬುದ್ದಿ
ಕಲಿಸಿ, ಕಾಡ ಉಳಿಸಬೇಕು
ಎನುವ ಆಸೆ ನನ್ನದು.
ದೀಪಕ ಬಿಳ್ಳೂರ
ಬೆಂಗಳೂರು