ಓ ಭಗವಂತ ನಾನೆಷ್ಟು ಪುಣ್ಯವಂತ
ಹೃದಯವಂತರ ಮನೆಯಲಿ ಜನಿಸಿ
ಪ್ರೀತಿಯ ಹೊದರಿನಲಿ ಬೆಳೆಸಿ
ವಾತ್ಸಲ್ಯದ ಕಡಲಿನಲಿ ಮುಳುಗಿಸಿ
ಬದುಕಿನ ದಾರಿ ತೋರಿಸುತಿಹೆ
ಓ ಭಗವಂತ ನಾನೆಷ್ಟು ಪುಣ್ಯವಂತ
ಕಷ್ಟ ಸುಖದಲಿ ಕೈ ಹಿಡಿದು ನಡೆಸುವ ಗೆಳೆಯರು
ಸರಿದಾರಿ ತೋರುವ ಗುರುವರ್ಯರು
ಭ್ರಾತೃತ್ವದ ಬಾಂಧವ್ಯಸುಖ ನೀಡುವ ಸಹೋದರ/ರಿಯರು
ದಾಂಪತ್ಯದ ಗುಟ್ಟನರಿತು ಬಾಳುವ ಧರ್ಮಪತ್ನಿ
ಎಲ್ಲಾ ಸುಖವ ದಯಪಾಲಿಸುತಿಹೆ
ಓ ಭಗವಂತ ನಾನೆಷ್ಟು ಪುಣ್ಯವಂತ
ಬಾಂದಳದಿ ಜಗದ ಚಲನೆಗೆ ನೇಸರ
ಸನಿಹದಲಿ ಜುಳು ಜುಳು ಹರಿಯುವ ಜೀವನದಿ
ಬಯಲಿನೊಳು ತಂಗಾಳಿಯ ತಂಪು ಸೂಸುವ ಮಾರುತ
ಧರೆಯ ಮಣ್ಣಿನೊಳು ಉದರ ಪೋಷಣೆಗೈಯುತಿಹ
ಈ ಜನ್ಮ ಸಂತೃಪ್ತಿಯ ಭಾವದೊಡಲು
ಓ ಭಗವಂತ ನಾನೆಷ್ಟು ಪುಣ್ಯವಂತ
ಪ್ರೀತಿ ಬಾಂಧವ್ಯದ ದೇವಮಂದಿರದಂತಿಹ ಮಹಾವಿದ್ಯಾಲಯ
ಕಹಿನೆನಪು ಮರೆಸಿ ಸಿಹಿ ನೆನಪು ಸೂಸುವ ವಿದ್ಯಾರ್ಥಿ ಸಮೂಹ
ಜ್ಞಾನದ ಖಜಾನೆಯ
ಪುಸ್ತಕ ಮನೆ ಜೊತೆಯಿರಲು ಇನ್ನೇನು ಬೇಕು?
ಓ ಭಗವಂತ ನಾನೆಷ್ಟು ಪುಣ್ಯವಂತ
✍️✍️ ಶಿವಕುಮಾರ ಕೋಡಿಹಾಳ ಮೂಡಲಗಿ