ಗೋಕಾಕ ಜಲಪಾತ
ತುಂಬಿ ಹರಿದಾಳವ್ವ ನಮ್ಮ ಘಟಪ್ರಭೆ
ಮೈದುಂಬಿ ನಿಂತಾಳವ್ವ ಗೋಕಾಕ ಧಬೆ ಧಬೆ
ಎಂಥ ಸಡಗರ ಹಾಸಿ ಅದೆಂತಾ ಸಂಭ್ರಮ ಚೆಲ್ಲಿ
ಧುಮ್ಮಿಕ್ಕಿ ಹರಿದಾಳ ಜಲಪಾತವಾಗಿ ನೋಡಬ್ಬೆ//
ಕಲ್ಲು ಬಂಡೆಯ ಮ್ಯಾಲೆ ನೀರಲೆಯ ಹೂಮಾಲೆ
ಒಂದರಿಂದೊಂದು ಬರುವ ನಲಿವ ಆ ಅಲೆ
ಬಳುಕುತ್ತಾ ಬೀಳುವ ತೊರೆಯ ಲೀಲೆ
ಜುಳುಗುಡುತ ಹರಿವ ಜಲಧಾರೆಯ ಸುವ್ವಾಲೆ
ತಂಪು ಇಂಪಿನ ಗಾನ ಹಾಡಿನ ಪದಮಾಲೆ//
ಸೂರ್ಯ ಚಂದ್ರರ ಬಚ್ಚಿಟ್ಟು ಚುಕ್ಕಿ ತಾರೆ ಮುಚ್ಚಿಟ್ಟು
ಬಾನ ಬಯಲಲ್ಲಿ ಬರೀ ನೀರಿನ ತೊಟ್ಟು
ಮುತ್ತು ಮಣಿಯಂಥ ಹನಿಯ ಕೂಡಿಟ್ಟು
ತುಂಬಿ ತುಳುಕೈತೆವ್ವಾ ಘಟಪ್ರಭಾ ಮೆಟ್ಟು
ಹಸಿರು ಗುಡ್ಡ ಬೆಟ್ಟ ಎಲ್ಲೆಲ್ಲೂ ಹರವಿಟ್ಟು//
ನಮ್ಮವ್ವ ಭುವನೇಶ್ವರಿಗೆ ಗರಿಯ ಹಚ್ಚಿ
ಭಾರತಮ್ಮನ ಹಿರಿಮೆ ಗರಿಮೆ ಹೆಚ್ಚಿ
ನಾಡಿನ ನಯಾಗರ ನಯನಮನೋಹರ
ರಸಿಕ ಪ್ರವಾಸಿಗರ ಬರಸೆಳೆದು ಹುಚ್ಚ ಹಚ್ಚಿ
ಹರಿಯುತಾಳ ನೋಡವ್ವ ಬರೀವಂಗ ನಾ ಮೆಚ್ಚಿ//
ಮೋಹಕ ನಡೆಯಿಂದ ಮನಸ್ಸುಗಳ ಸೆಳೆದು
ಮೂಕ ಮುಗ್ಧರಾಗಿಸಿ ಮೈಚಳಿ ಬಿಡಿಸಿ ಎದ್ದು
ಹುಸಿನಗಿಯ ಬೀರುತ ಎಲ್ಲ ಮನೆಗೆದ್ದು
ಭೋರ್ಗರೆದು ಹರಿತಾಳ ಝರಿಯಲಿ ನೋಡ
ಹನಿಹನಿ ಮುತ್ತು ಮಣಿಯ ಇಂಪಾದ ಸದ್ದು
ನನ್ನ ನಾ ಮರೆತು ಕ್ಷಣ ಹೊತ್ತು ಮಿಂದೆದ್ದೆ//
ಮುಂಗಾರು ಮಳೆಯ ಜಲಧಾರೆಯವ್ವ
ಸುರಿಸುರಿದು ಹರಿ ಹರಿದು ಇಲ್ಲಿ ಬಂದಿತವ್ವ
ಈ ರಮ್ಯತಾನದ ಭಾವಯಾನ ನೋಡಿ ತಣಿಯವ್ವ
ಹೃದಯ ಸೂರೆಗೊಳ್ಳುತ ಸಾಗಿದೆ ನೋಡವ್ವ
ಈ ವಿಸ್ಮಯದಿ ನಾ ತನ್ಮಯ ಕೇಳವ್ವಾ//
ಎಲ್ಲ ಬನ್ನಿರವ್ವ ಕಣ್ತುಂಬಿಕೊಂಡ ಹಾಡಿರವ್ವ
ಮನ ತಣಿವಂಗ ಹೆಜ್ಜೆ ಹಾಕಿ ಕುಣಿಯಿರವ್ವ
ಸೃಷ್ಟಿಸಿರಿಯ ಚೆಲುವ ಚೆಂದಾಗಿ ನೋಡಿರವ್ವ
ಕೈ ಬೀಸಿ ಕರದಾಳ ನಮ್ಮನ್ನ ಭೂತಾಯಿ ಇಲ್ಲೆವ್ವ
ಒಮ್ಮೆ ನೋಡಿದರ ಎದೆ ಬನ ಹಸಿರವ್ವ//
ಡಾ. ಅನ್ನಪೂರ್ಣ ಹಿರೇಮಠ