ಅಕ್ಷರ ಲೋಕದ ಚಕ್ರವರ್ತಿ
ಸಾಸಿರ ಅಕ್ಷಿಗಳೊಳ್ ಎನ್ನ ತಿದ್ದಿದ ಸಿದ್ದಾಂತಿ
ವಿದ್ಯೆಯ ಪರ್ವತವನು ಸೀಳಿದ ಬೆಳಕು
ಸಮುದ್ರ ಮಥನದ ಸಿಹಿ ಅಮೃತ ನೀನು
ಕಲಿಸಿದ ಗುರುವಿಗೆ ಸಾವಿರದ ಶರಣು
ಕಾಲಜ್ಞಾನ ಬರೆದ ಮಹಾ ಯೋಗಿ ನೀನು
ಶಬ್ದ ಭಂಡಾರದ ಮಹಾ ಸಂಪುಟ ನೀನು
ಅರಿವು ಹೆಚ್ಚಿಸಿ ಅಜ್ಞಾನ ಅಳಿಸಿದ ಸುಧಾರಕ
ಅಂಧ ಲೋಕದಿ ಬೆಳ್ಳಿ ಕಿರಣ ಕಾಣಿಸಿದವನು
ಸದ್ಗುಣಗಳ ಬಿತ್ತಿ ದೈವತ್ವದ ಹಣ್ಣುಂಡವನು
ಅಕ್ಷರಗಳ ಜೋಡಿಸಿ ಜೀವದ ಹಸಿ ಚಿತ್ತಾರದ
ಅದೃಷ್ಟ ರೇಖೆ ಎಳೆದ ರೇಖಾಗಣಿತಜ್ಞ ನೀನು
ಸಮಾನತೆಯ ಹರಿಕಾರ ಶಿಸ್ತಿನ ಸಿಪಾಯಿ ನೀನು
ಬರಹ ಲೋಕದ ಜಾದೂಗಾರ ಅಕ್ಷರಗಳ
ಅಬ್ಬರಕೆ ಎನ್ನ ಕೊಂಡೊಯ್ದ ಕನಸುಗಾರ
ಕಗ್ಗಲ್ಲಿನ ಮೇಲೆ ಅಳಿಸಲಾಗದ ಶಿಲಾಶಾಸನ
ರಚಿಸಿದ ಲಿಪಿಕಾರ ನೀನು ನನ್ನ ಗುರು
ಎನ್ನೊಡಲ ಮಧ್ಯೆ ಅಂಕುರಿಸಿದ ಕಾವ್ಯ
ಲೋಕಕ್ಕೆ ಏಣಿ ಹಾಕಿದ ಅಭಿಯಾಂತ್ರಿಕ
ಎನ್ನ ಪಾಲಿನ ಮಹಾವಿಶ್ವವಿದ್ಯಾಲಯ
ಅರಿವಿನ ಗುರುವಿಗೆ ಕೋಟಿ ನಮನ
ಕಾಣದ ಲೋಕದಿ ಎಲ್ಲವನೂ ತಿಳಿದು
ನಿನ್ನೆಲ್ಲ ವಿದ್ಯೆಯ ನಿಸ್ವಾರ್ಥದಿ ಎನಗೆ
ಧಾರೆಯೆರೆದ ವಿದ್ಯಾ ಜಲಪಾತ ನೀನು
ಸಪ್ತ ಸಾಗರದ ಸ್ವಾತಿ ಮುತ್ತು ನೀನು
ಇಂಗಳಗಿ ದಾವಲಮಲೀಕ
