ಕೃತಿ ಪರಿಚಯ: ಬೈಲಹೊಂಗಲ ಸಾಂಸ್ಕೃತಿಕ ಪರಂಪರೆ
ಲೇಖಕ : ಸಿ. ವೈ. ಮೆಣಸಿನಕಾಯಿ
ಪ್ರಕಾಶಕರು: —ಶೀರಾಮ್ ಬುಕ್ ಸೆಂಟರ್ ಮಂಡ್ಯ
“ಬೈಲಹೊಂಗಲ ನಾಡ ಚಂದ, ಗಂಗಾಳ ಮಾಟ ಚಂದ ಗಂಗೆಯ ಹರಿಯುವ ನೀರ ಚಂದ, ಹೊಳೆಯಾಗ ಮಂಗಲವಾದ್ಯ ಚೆಂದ ಮಠದಾಗ”ಎಂಬ ಬೈಲಹೊಂಗಲದ ವೈಶಿಷ್ಟ ಕುರಿತು ಜನಪದದೊಂದಿಗೆ ಪ್ರಾರಂಭವಾಗುವ“ಬೈಲಹೊಂಗಲ ಸಾಂಸ್ಕೃತಿಕ ಪರಂಪರೆ” ಎಂಬ ಈ ಕೃತಿಯು ಬೈಲಹೊಂಗಲ ತಾಲೂಕಿನ ಐತಿಹಾಸಿಕ, ಸಾಂಸ್ಕೃತಿಕ ಮತ್ತು ಸಾಮಾಜಿಕ ಪರಂಪರೆಯ ಸೊಗಡನ್ನು ಹೊಸ ಅಧ್ಯಾಯವಾಗಿ ಓದುಗರ ಮುಂದೆ ತರುತ್ತದೆ. ಲೇಖಕ ಸಿ. ವೈ. ಮೆಣಸಿನಕಾಯಿ ಅವರು ತಮ್ಮ ಸಂಶೋಧನೆಯ ಆಧಾರದ ಮೇಲೆ ಗ್ರಂಥವನ್ನು ರಚಿಸಿದ್ದು, ಈ ಕ್ಷೇತ್ರದ ಸಂಪೂರ್ಣ ಅಧ್ಯಯನವನ್ನು ಒಂದೇ ವೇದಿಕೆಯಡಿ ತರುವ ಮಹತ್ವದ ಕಾರ್ಯವನ್ನು ಮಾಡಿದ್ದಾರೆ.
ಕೃತಿಯ ಪ್ರಮುಖ ವಿಷಯಗಳು:
ಐತಿಹಾಸಿಕ ಪ್ರಸ್ತಾಪ: ಲೇಖಕರು ಬೈಲಹೊಂಗಲದ ಇತಿಹಾಸವನ್ನು ಒಳಗೊಂಡು, ಅದರ ಸಾಮಾಜಿಕ, ಆರ್ಥಿಕ, ಮತ್ತು ರಾಜಕೀಯ ಬೆಳವಣಿಗೆಯನ್ನು ವಿಶ್ಲೇಷಿಸಿದ್ದಾರೆ ಈ ಕೃತಿಯ ಪ್ರಮುಖ ಆಕರ್ಷಣೆಯೆಂದರೆ ರಾಣಿ ಚೆನ್ನಮ್ಮ ಅವರ ಹೋರಾಟ ಮತ್ತು ತ್ಯಾಗ. ಭಾರತ ಸ್ವಾತಂತ್ರ‍್ಯ ಹೋರಾಟದ ಮೊದಲ ಹೆಜ್ಜೆಗಳಲ್ಲಿ ಅತ್ಯಂತ ಪ್ರಮುಖವಾದುದು. ಸಂಗೊಳ್ಳಿ ರಾಯಣ್ಣ ಮತ್ತು ಅಮಟೂರ ಬಾಳಪ್ಪ , ಅವರ ಸಾಧನೆ ಇಲ್ಲಿ ಸವಿವರವಾಗಿ ಉಲ್ಲೇಖಿಸಲಾಗಿದೆ.ಈ ಹೋರಾಟಗಳಿಗೆ ಪೂರಕವಾದ ಸ್ಥಳೀಯ ಜನಸಾಮಾನ್ಯರ ಪಾತ್ರವನ್ನು ಈ ಕೃತಿಯು ಪ್ರಾಮುಖ್ಯತೆಯಿಂದ ವಿಶ್ಲೇಷಿಸುತ್ತದೆ.
ಬೈಲಹೊಂಗಲದ ವಿಶಿಷ್ಟ ಉಡುಪು ಶೈಲಿಗಳು ಮತ್ತು ಅದರಲ್ಲಿರುವ ವೈವಿಧ್ಯತೆಯನ್ನು ಈ ಕೃತಿಯು ಕೊಂಡಾಡುತ್ತದೆ. ಹಳ್ಳಿಗಳಲ್ಲಿ ನಡೆಯುವ ಸ್ಥಳೀಯ ಆಟಗಳು, ಗ್ರಾಮೀಣ ಚಟುವಟಿಕೆಗಳು ಮತ್ತು ಕ್ರೀಡಾಂಗಣದ ಸಂಸ್ಕೃತಿಯ ಪೈಕಿ ಪ್ರಮುಖವಾದ ಕುಂಟೆಬಿಲ್ಲೆ , ಕುಸ್ತಿ ಮುಂತಾದವುಗಳ ಉಲ್ಲೇಖವಿದೆ. ಬೈಲಹೊಂಗಲದ ಸಾಂಸ್ಕೃತಿಕ ಪರಂಪರೆಯ ಮಠಗಳು ಮತ್ತು ದೇವಸ್ಥಾನಗಳ ಪಾತ್ರವನ್ನು ವಿಶ್ಲೇಷಿಸಲಾಗಿದೆ. ಬೈಲಹೊಂಗಲದ ಪ್ರಮುಖ ಧಾರ್ಮಿಕ ಜಾತ್ರೆಗಳಾದ ಶ್ರೀ ಮರಡಿ ಬಸವೇಶ್ವರ ಜಾತ್ರೆ, ಇಂಚಲ ಜಾತ್ರಾ ಮಹೋತ್ಸವ, ಮತ್ತು ಸ್ಥಳೀಯ ಹಬ್ಬಗಳ ವೈಶಿಷ್ಟ್ಯತೆಯನ್ನು ಈ ಕೃತಿಯು ಚಿತ್ರಿಸುತ್ತದೆ.ಬೈಲಹೊಂಗಲದ ಪರಿಸರ ವೈಶಿಷ್ಟ್ಯ, ನದಿಗಳು, ಹಳ್ಳಿಗಳು, ಬಯಲು ಭಾಗಗಳು, ಮತ್ತು ಅಲ್ಲಿನ ಜೀವ-ಜಲ ಸಂಪತ್ತು, ಇದರಲ್ಲಿ ಮುಖ್ಯವಾಗಿ ಉಲ್ಲೇಖವಾಗಿದೆ. ಇದರ ಜೊತೆಗೆಬೈಲಹೊಂಗಲದ ಸಾಹಿತಿಗಳು, ಕವಿಗಳು, ಸಾಹಸಿಗಳು, ಮತ್ತು ಚಲನಶೀಲ ವ್ಯಕ್ತಿತ್ವಗಳ ಜೀವನಕಥೆ ಮತ್ತು ಸಾಧನೆಗಳನ್ನು ಲೇಖಕರು ಸವಿವರವಾಗಿ ವಿವರಿಸಿದ್ದಾರೆ.ಮುಖ್ಯವಾಗಿಹೋರಾಟಗಾರರು, ಕೌಟುಂಬಿಕ ನಾಯಕರು, ಸಮಾಜಸೇವಕರು, ಮತ್ತು ಕ್ರೀಡಾಪಟುಗಳ ಹೆಸರನ್ನು ಮರೆಯದಂತೆಯೇ ಈ ಕೃತಿಯು ಸಂಗ್ರಹಿಸಿದೆ.
ಕೃತಿಯ ವೈಶಿಷ್ಟ್ಯಗಳು: ಜೀವಂತ ನಾಡಿನ ಚಿತ್ರಣ:
ಕೃತಿಯ ಭಾಷೆಯು ಸರಳವಾಗಿದ್ದು, ಓದುಗರಿಗೆ ನಾಡಿನ ಜೀವನದ ಗಾಢ ಸೊಗಡನ್ನು ಮುಟ್ಟಿಸುತ್ತದೆ ಸಮಗ್ರ ಮಾಹಿತಿ:ಐತಿಹಾಸಿಕ ಮತ್ತು ಸಾಂಸ್ಕೃತಿಕ ಆಧಾರವನ್ನು ಸಮರ್ಪಕವಾಗಿ ಬಳಸಿ ಕೃತಿಯನ್ನು ಸಂಪೂರ್ಣ ಅಧ್ಯಯನಯೋಗ್ಯ ಗ್ರಂಥವನ್ನಾಗಿ ರೂಪಿಸಲಾಗಿದೆ.ಜನಪದ ಸಂಗೀತ ಮತ್ತು ಸಾಹಿತ್ಯ:ಕೃತಿಯು ಭಾಗಶಃ ನಾಡಿನ ಸಾಹಿತ್ಯ ಮತ್ತು ಕಲೆಗಳನ್ನು ವರ್ಣಿಸುವ ಮೂಲಕ, ಪ್ರತಿ ಓದುಗನ ಮನಸ್ಸಿನಲ್ಲಿ ಗ್ರಾಮೀಣ ಪರಿಸರದ ಭಾವನೆಗಳನ್ನು ಮೂಡಿಸುತ್ತದೆ.
“ಬೈಲಹೊಂಗಲ ಸಾಂಸ್ಕೃತಿಕ ಪರಂಪರೆ” ಕೃತಿಯು ಎಲ್ಲಾ ವಯೋಮಾನದ ಓದುಗರಿಗೆ ಪ್ರಸ್ತುತವಾಗಿದೆ ಬೈಲಹೊಂಗಲ ನಾಡಿನ ಇತಿಹಾಸವನ್ನು ಅರಿಯುವವರಿಗೂ, ಸ್ಥಳೀಯ ಸಂಸ್ಕೃತಿಯನ್ನು ತಿಳಿಯಲು ಇಚ್ಛಿಸುವವರಿಗೂ ಇದು ಮಾರ್ಗದರ್ಶನ ಗ್ರಂಥವಾಗಿದೆ. ಈ ಕೃತಿಯು ಓದುಗರನ್ನು ತಾವು ಕಂಡಿರದ ಅಥವಾ ಮರೆಯಾದ ನೆನಪಿನೊಂದಿಗೆ ಪುನಃ ಸಂಪರ್ಕಿಸಿಕೊಳ್ಳುವಂತೆ ಮಾಡುತ್ತದೆ:
ವಿನೋದ ರಾ ಪಾಟೀಲ, ಚಿಕ್ಕಬಾಗೇವಾಡಿ