ಅಪ್ಪನೆಂಬ ಅದ್ಭುತ ಸಾಗರ
ಆಕಾಶದಲ್ಲಿ ಮಿನುಗುವ ನಕ್ಷತ್ರಗಳ ಬೆಳಕಿನಲಿ ಮಿಂಚುಹುಳವಾಗಿದ್ದನು ನನ್ನಪ್ಪ
ತ್ಯಾಗದ ಪ್ರತಿರೂಪವಾದರೂ ಜಗತ್ತಿಗೆ ಕಾಣದ ಭಾವಜೀವಿ
ನನ್ನಪ್ಪ
ಕೈ ಹಿಡಿದು ಶಿಕ್ಷಣ ಕೊಡಿಸಿ
ಹೆಗಲಿಗೆ ಹೆಗಲು ಕೊಟ್ಟು
ಸಂಸಾರವೆಂಬ ಸಾಗರವ
ಅವ್ವನೊಡನೆ ಈಜಿ ಬದುಕಿನ ದಡ ಮುಟ್ಟಿಸಿದ
ಅದ್ಭುತ ಸಾಗರ ನನ್ನಪ್ಪ
ಸುಖದಲ್ಲಿ ನಗಿಸಿ
ಜವಾಬ್ದಾರಿಯಿಂದ ನಮ್ಮನ್ನು ಗದರಿಸಿ
ಅಪ್ಪನೆಂದರೆ ಬಾಲ್ಯದ ಭೂತವೆಂಬಂತೆ ಬಿಂಬಿಸಿದರೂ
ಸಂಸಾರ ನೊಗ ಹೊತ್ತ
ಬಾಳುವೆಯ ಜೋಡೆತ್ತು
ನನ್ನಪ್ಪ
ಒಪ್ಪತ್ತಿನ ಊಟದಿಂದ ಹಿಡಿದು ಐಶಾರಾಮಿ ಊಟದವರೆಗೆ ದುಡಿಮೆಯ ಬೆವರಿನ ಬೆಲೆ ತಿಳಿದುಕೊಳ್ಳುವದ ಕಲಿಸಿದ
ಬೆವರ ಹನಿಯ ಕೂಲಿಕಾರ
ಮಕ್ಕಳ ಪಾಲಿನ ದೇವರು
ದುಡಿಮೆಯ ನಂಬಿದ ಸಂತನಾಗಿದ್ದರು
ನನ್ನಪ್ಪ
(ವಿಶ್ವ ಅಪ್ಪಂದಿರ ದಿನದ ಸವಿನೆನಪಿಗಾಗಿ)
✍️✍️ ಶಿವಕುಮಾರ ಕೋಡಿಹಾಳ ಮೂಡಲಗಿ