ಮೋಹಿನಿ ಏಕಾದಶಿಯ ಮಹತ್ವ ಅರಿತುಕೊಳ್ಳಿ

ಏಕಾದಶಿ ತಿಥಿಯು ಭಗವಾನ್ ವಿಷ್ಣುವಿನ ಆರಾಧನೆಗೆ ಅತ್ಯುತ್ತಮ ಮತ್ತು ಅತ್ಯಂತ ಫಲಪ್ರದವೆಂದು ಪರಿಗಣಿಸಲಾಗಿದೆ. ವೈಶಾಖ ಮಾಸದ ಶುಕ್ಲ ಪಕ್ಷದ ಏಕಾದಶಿಯನ್ನು ಮೋಹಿನಿ ಏಕಾದಶಿ ಎಂದು ಕರೆಯಲಾಗುತ್ತದೆ. ಈ ಬಾರಿ ಮೋಹಿನಿ ಏಕಾದಶಿ ವ್ರತವನ್ನು ಮೇ 12 ರಂದು ಆಚರಿಸಲಾಗುವುದು. ಈ ದಿನ ಶ್ರೀಹರಿಯ ಮೋಹಿನಿ ರೂಪವನ್ನು ಪೂಜಿಸಲಾಗುತ್ತದೆ. ಮೋಹಿನಿ ಏಕಾದಶಿ ವ್ರತವು ಯಶಸ್ಸಿಗೆ ಅತ್ಯಂತ ಪರಿಪೂರ್ಣವೆಂದು ಪರಿಗಣಿಸಲಾಗಿದೆ. ವಿಷ್ಣುವಿನ ಈ ವ್ರತವನ್ನು ಮನಸ್ಸಿನಲ್ಲಿ ನಿಜವಾದ ಭಕ್ತಿಯಿಂದ ಆಚರಿಸುವುದರಿಂದ ನಿಮ್ಮ ಎಲ್ಲಾ ಇಷ್ಟಾರ್ಥಗಳು ಈಡೇರುತ್ತವೆ. ಮೋಹಿನಿ ಏಕಾದಶಿ ವ್ರತವನ್ನು ಆಚರಿಸುವುದು ಹೇಗೆ..? ಯಾವ ಶುಭ ಮುಹೂರ್ತದಲ್ಲಿ ಈ ಬಾರಿ ಮೋಹಿನಿ ಏಕಾದಶಿ ವ್ರತವನ್ನು ಆಚರಿಸಬೇಕು..?

ಮೋಹಿನಿ ಏಕಾದಶಿ ಶುಭ ಮುಹೂರ್ತ:

ಹಿಂದೂ ಕ್ಯಾಲೆಂಡರ್ ಪ್ರಕಾರ, ಮೋಹಿನಿ ಏಕಾದಶಿ ವ್ರತವನ್ನು ಈ ಬಾರಿ ಮೇ 12 ರಂದು ಗುರುವಾರ ಆಚರಿಸಲಾಗುತ್ತದೆ ಏಕಾದಶಿ ಆರಂಭ: ಮೇ 11ರ ಬುಧವಾರ ಸಂಜೆ 7.30 ಕ್ಕೆ

ಏಕಾದಶಿ ತಿಥಿ ಮುಕ್ತಾಯ: ಮೇ 12 ಗುರುವಾರ ಸಂಜೆ 06.51 ರವರೆಗೆ ಏಕಾದಶಿ ಪಾರಣ ಮುಹೂರ್ತ: ಮೇ 13 ರಂದು ಶುಕ್ರವಾರ ಉದಯ ತಿಥಿಯು ಚಾಲ್ತಿಯಲ್ಲಿರುವ ಕಾರಣ ಮೇ 12 ರಂದು ಮೋಹಿನಿ ಏಕಾದಶಿಯ ಉಪವಾಸವನ್ನು ಆಚರಿಸಲಾಗುತ್ತದೆ ಮತ್ತು ಮೇ 13 ರಂದು ಪಾರಣವನ್ನು ಮಾಡಲಾಗುತ್ತದೆ.

ಮೋಹನಿ ಏಕಾದಶಿಯ ಮಹತ್ವ ಮತ್ತು ನಂಬಿಕೆಗಳು:

ಮೋಹಿನಿ ಏಕಾದಶಿ ವ್ರತವನ್ನು ಆಚರಿಸುವ ಮೂಲಕ ಆ ವ್ಯಕ್ತಿಯ ಎಲ್ಲಾ ರೀತಿಯ ಲೌಕಿಕ ಬಾಂಧವ್ಯಗಳು ವ್ಯಕ್ತಿಯ ಮನಸ್ಸಿನಿಂದ ಕೊನೆಗೊಳ್ಳಲು ಪ್ರಾರಂಭಿಸುತ್ತವೆ ಮತ್ತು ಒಬ್ಬನು ದೇವರ ಆಧ್ಯಾತ್ಮಿಕ ಅಭ್ಯಾಸದಲ್ಲಿ ತೊಡಗುತ್ತಾನೆ ಎಂದು ಹೇಳಲಾಗಿದೆ. ಮೋಹಿನಿ ಏಕಾದಶಿಯು ಮೋಹವನ್ನು ಹೋಗಲಾಡಿಸುವ ಏಕಾದಶಿಯೇ ಎಂಬುದನ್ನು ಪದ್ಮಪುರಾಣದಲ್ಲಿ ಕಂಡುಬರುವ ಏಕಾದಶಿಯ ಕಥೆಯೂ ಸ್ಪಷ್ಟಪಡಿಸುತ್ತದೆ.

ಈ ಉಪವಾಸವನ್ನು ಆಚರಿಸುವುದಕ್ಕಿಂತ ಉತ್ತಮವಾದ ಉಪವಾಸವು ಜಗತ್ತಿನಲ್ಲಿ ಮತ್ತೊಂದಿಲ್ಲ. ಈ ಏಕಾದಶಿ ವ್ರತದ ಮಹಿಮೆಯನ್ನು ಓದುವುದರಿಂದ ಅಥವಾ ಕೇಳುವುದರಿಂದ ಸಾವಿರ ಗೋವುಗಳನ್ನು ದಾನ ಮಾಡಿದ ಫಲವನ್ನು ಪಡೆಯಲಾಗುತ್ತದೆ. ಮೋಹಿನಿ ಏಕಾದಶಿಯಂದು ಉಪವಾಸವನ್ನು ಆಚರಿಸದವರೂ ಸಹ ಬೆಳಗ್ಗಿನಿಂದಲೇ ಪೂಜೆ, ಆರತಿಯನ್ನು ಮಾಡಿ, ಏಕಾದಶಿ ಉಪವಾಸದ ಮಹತ್ವವನ್ನು ಕೇಳಬಹುದು. ಇದರೊಂದಿಗೆ ಈ ದಿನ ವಿಷ್ಣುವಿಗೆ ಶ್ರೀಗಂಧದ ತಿಲಕ ಮತ್ತು ಬಾರ್ಲಿಯನ್ನು ಅರ್ಪಿಸಿ.

ಪೂಜೆ ಮತ್ತು ವ್ರತ ಮಾಡುವ ವಿಧಾನ:

ಏಕಾದಶಿ ಉಪವಾಸವನ್ನು ಆಚರಿಸುವವರು ದಶಮಿ ತಿಥಿಯ ಸಂಜೆಯಿಂದ ಆಹಾರ, ಈರುಳ್ಳಿ ಮತ್ತು ಬೆಳ್ಳುಳ್ಳಿಯನ್ನು ತ್ಯಜಿಸಬೇಕು. ಏಕಾದಶಿಯ ದಿನ ಬ್ರಹ್ಮ ಮುಹೂರ್ತದಲ್ಲಿ ಎದ್ದು ಮನೆಯನ್ನು ಸ್ವಚ್ಛಗೊಳಿಸಿ ನಂತರ ಸ್ನಾನ ಮಾಡಬೇಕು. ಬಳಿಕ ಮನೆಯ ಪೂಜಾ ಸ್ಥಳಕ್ಕೆ ಬಂದು ಉಪವಾಸ ಮಾಡುವ ಸಂಕಲ್ಪ ಕೈಗೊಳ್ಳಬೇಕು. ಇದಾದ ನಂತರ ವಿಷ್ಣುವಿಗೆ ಧೂಪ, ದೀಪ, ತುಳಸಿ, ಅಕ್ಷತೆ, ಕಲಶ, ತೆಂಗಿನಕಾಯಿ ಮತ್ತು ಒಣ ಹಣ್ಣುಗಳನ್ನು ಅರ್ಪಿಸಿ ಪೂಜಿಸಬೇಕು. ಅದರ ನಂತರ ಸೂರ್ಯ ದೇವರಿಗೆ ನೀರನ್ನು ಅರ್ಪಿಸಬೇಕು. ಏಕಾದಶಿಯಂದು ನೀರನ್ನು ಸಹ ಸೇವಿಸದೇ ಉಪವಾಸ ವ್ರತವನ್ನು ಮಾಡಬೇಕೆನ್ನುವ ನಿಯಮವಿದೆ. ನೀರನ್ನು ಸೇವಿಸದೇ ಉಪವಾಸ ಮಾಡಲು ಸಾಧ್ಯವಾಗದಿದ್ದರೆ ಫಲಾಹಾರವನ್ನು ತೆಗೆದುಕೊಳ್ಳುವ ಮೂಲಕ ಉಪವಾಸ ವ್ರತವನ್ನು ಮಾಡಬಹುದು.

ಏಕಾದಶಿ ಉಪವಾಸವನ್ನು ಆಚರಿಸುವವರು ರಾತ್ರಿಯಲ್ಲಿ ಮಲಗಬಾರದು, ಆದರೆ ರಾತ್ರಿಯಲ್ಲಿ ಎಚ್ಚರವಾಗಿದ್ದುಕೊಂಡೇ ಭಜನೆ-ಕೀರ್ತನೆಯಲ್ಲಿ ಸಮಯ ಕಳೆಯಬೇಕು. ನಂತರ ಮುಂಜಾನೆ ಎದ್ದಾಕ್ಷಣ ತುಳಸಿಗೆ ಬೆಳಗ್ಗೆ ನೀರನ್ನು ಅರ್ಪಿಸಿ. ಇದಾದ ನಂತರ ಸಂಜೆ ತುಳಸಿ ಬಳಿ ಹಸುವಿನ ತುಪ್ಪದ ದೀಪವನ್ನು ಹಚ್ಚಿ. ಏಕಾದಶಿ ತಿಥಿಯು ಮುಕ್ತಾಯವಾಗುವ ಮೊದಲು ಬ್ರಾಹ್ಮಣರಿಗೆ ಆಹಾರ ಮತ್ತು ದಕ್ಷಿಣೆಯನ್ನು ನೀಡಬೇಕು.

ಈ ಏಕಾದಶಿ ವ್ರತದ ಕಥೆಯನ್ನು ಸರಳವಾಗಿ ಓದುವುದರಿಂದ ಮತ್ತು ಕೇಳುವುದರಿಂದ ಸಾವಿರಾರು ಗೋವನ್ನು ದಾನ ಮಾಡಿದ ಪುಣ್ಯ ದೊರೆಯುತ್ತದೆ ಎಂದು ಪದ್ಮ ಪುರಾಣದಲ್ಲಿ ಹೇಳಲಾಗಿದೆ. ಆದರೆ ಉಪವಾಸದೊಂದಿಗೆ ಕಥೆಯನ್ನು ಕೇಳುವುದರಿಂದ ಉತ್ತಮ ಫಲ ಪ್ರಾಪ್ತಿಯಾಗುತ್ತದೆ.

ಮೋಹಿನಿ ಏಕಾದಶಿ ಮಹತ್ವ:

ಈ ಮೋಹಿನಿ ಏಕಾದಶಿಯನ್ನು ವಿಶೇಷವೆಂದು ಪರಿಗಣಿಸಲಾಗಿದೆ. ಜ್ಯೋತಿಷ್ಯಶಾಸ್ತ್ರದ ಪ್ರಕಾರ, ಈ ದಿನ ಶನಿ ಮತ್ತು ಗುರು ತಮ್ಮದೇ ರಾಶಿಯಲ್ಲಿ ಕುಳಿತುಕೊಳ್ಳುತ್ತಾರೆ. ಶನಿಯು ಕುಂಭ ರಾಶಿಯಲ್ಲಿ ಮತ್ತು ಗುರು ಮೀನ ರಾಶಿಯಲ್ಲಿ ಸಾಗಲಿದ್ದಾರೆ. ಗುರುವಾರ ಭಗವಾನ್ ವಿಷ್ಣುವಿಗೆ ಸಮರ್ಪಿತವಾಗಿದೆ. ಏಕಾದಶಿಯ ದಿನಾಂಕವು ಈ ದಿನದಂದು ಬಂದಾಗ, ಇದು ಅತ್ಯಂತ ಮಂಗಳಕರ ಮತ್ತು ಅತ್ಯಂತ ಫಲಪ್ರದವೆಂದು ಪರಿಗಣಿಸಲಾಗುತ್ತದೆ.

ಮೋಹಿನಿ ಏಕಾದಶಿ ಪರಿಹಾರ:

ಏಕಾದಶಿಯ ದಿನದಂದು ಕೈಗೊಳ್ಳುವ ಕ್ರಮಗಳು ಜೀವನದಲ್ಲಿ ಐಶ್ವರ್ಯವನ್ನು ತರುತ್ತವೆ ಮತ್ತು ಇಷ್ಟಾರ್ಥಗಳನ್ನು ಪೂರೈಸುತ್ತವೆ ಎಂದು ನಂಬಲಾಗಿದೆ. ನೀವು ಏಕಾದಶಿ ಉಪವಾಸವನ್ನು ಆಚರಿಸದಿದ್ದರೂ, ಈ ಏಕಾದಶಿ ಉಪವಾಸದಲ್ಲಿ ನೀವು ಕ್ರಮಗಳನ್ನು ತೆಗೆದುಕೊಳ್ಳಬಹುದು. ಮೋಹಿನಿ ಏಕಾದಶಿ ದಿನದಂದು ಕೇಸರಿಯನ್ನು ಬೆರೆಸಿ ಹಾಲನ್ನು ಕುದಿಸಿ, ಹಾಲು ತಣ್ಣಗಾದ ಬಳಿಕ ಅದಕ್ಕೆ ತುಳಸಿ ಎಲೆಗಳನ್ನು ಸೇರಿಸಿ. ಇದರ ನಂತರ ಕೇಸರಿ ಮಿಶ್ರಿತ ಹಾಲನ್ನು ಭಗವಾನ್‌ ಶ್ರೀಹರಿ ಮತ್ತು ಲಕ್ಷ್ಮಿ ದೇವಿಗೆ ಅರ್ಪಿಸಿ. ವಿಷ್ಣು ಮತ್ತು ಲಕ್ಷ್ಮಿ ಮಂತ್ರವನ್ನು ಪಠಿಸಿ. ಇದಾದ ನಂತರ ಈ ಹಾಲನ್ನು ನೀವು ಕೂಡ ಪ್ರಸಾದದ ರೂಪದಲ್ಲಿ ತೆಗೆದುಕೊಂಡು ಕುಟುಂಬದ ಸದಸ್ಯರಿಗೂ ನೀಡಿ. ಈ ಪರಿಹಾರವನ್ನು ಮಾಡುವುದರಿಂದ ನೀವು ಉತ್ತಮ ಆರೋಗ್ಯ ಮತ್ತು ಸಂಪತ್ತನ್ನು ಪಡೆಯುತ್ತೀರಿ.

ಇದೇ ಮೇ 12 ರಂದು ಗುರುವಾರ ಮೋಹಿನಿ ಏಕಾದಶಿ ವ್ರತವನ್ನು ಈ ಮೇಲಿನ ಶುಭ ಮುಹೂರ್ತದಲ್ಲಿ ಆಚರಿಸಲಾಗುವುದು. ಮೋಹಿನಿ ಏಕಾದಶಿ ವ್ರತವನ್ನು ಆಚರಿಸುವುದರಿಂದ ಗೋದಾನ ಮಾಡಿದಷ್ಟು ಪುಣ್ಯ ಪ್ರಾಪ್ತಿಯಾಗುತ್ತದೆ.

ಇದರೊಂದಿಗೆ ನಿಮ್ಮೆಲ್ಲಾ ಇಷ್ಟಾರ್ಥಗಳು ಪೂರ್ಣಗೊಂಡು ಉತ್ತಮ ಆರೋಗ್ಯ ಮತ್ತು ಸಂಪತ್ತನ್ನು ಪಡೆದುಕೊಳ್ಳುತ್ತೀರಿ.‌ ‌ ‌‌ ‌ ‌

ಮೋಹಿನಿ ಏಕಾದಶಿ: ಏಕಾದಶಿ ವ್ರತದಲ್ಲಿ ಈ ನಿಯಮಗಳಿಲ್ಲದಿದ್ದರೆ ವ್ರತ ಮಾಡಿಯೂ ವ್ಯರ್ಥ..!

ಭಗವಾನ್‌ ವಿಷ್ಣುವಿನ ಅನುಗ್ರಹವನ್ನು ಪಡೆಯುವುದಕ್ಕಾಗಿ ಮೋಹಿನಿ ಏಕಾದಶಿ ವ್ರತವನ್ನು ಆಚರಿಸಲಾಗುತ್ತದೆ. ಮೋಹಿನಿ ಏಕಾದಶಿ ಪೂಜೆಯ ಸಂಪೂರ್ಣ ಫಲವನ್ನು ಪಡೆಯಲು ಯಾವ ಪಾಲಿಸಬೇಕಾದ ನಿಯಮಗಳು.

ಪ್ರತಿ ತಿಂಗಳು ಬರುವ ಕೃಷ್ಣ ಮತ್ತು ಶುಕ್ಲ ಈ ಎರಡೂ ಪಕ್ಷಗಳಲ್ಲಿ ಏಕಾದಶಿ ವ್ರತವನ್ನು ಆಚರಿಸಲಾಗುತ್ತದೆ. ವೈಶಾಖ ಮಾಸದ ಶುಕ್ಲ ಪಕ್ಷದ ಏಕಾದಶಿ ತಿಥಿಯನ್ನು ಮೋಹಿನಿ ಏಕಾದಶಿ ಎಂದು ಕರೆಯಲಾಗುತ್ತದೆ. ಎಲ್ಲಾ ಏಕಾದಶಿಗಳಲ್ಲಿ ಮೋಹಿನಿ ಏಕಾದಶಿಯನ್ನು ಅತ್ಯುತ್ತಮವೆಂದು ಪರಿಗಣಿಸಲಾಗಿದೆ. ಅಂತಹ ಪರಿಸ್ಥಿತಿಯಲ್ಲಿ, ಈ ದಿನದಂದು ಮಾಡುವ ಪೂಜೆ ಮತ್ತು ಉಪವಾಸದ ಮೂಲಕ ಓರ್ವ ವ್ಯಕ್ತಿಯು ಭಗವಾನ್‌ ವಿಷ್ಣುವಿನ ವಿಶೇಷ ಅನುಗ್ರಹವನ್ನು ಪಡೆಯುತ್ತಾನೆ. ಹಾಗಾದರೆ ಪೂಜೆಯ ಸಂಪೂರ್ಣ ಫಲವನ್ನು ಪಡೆಯಲು ಯಾವ ಯಾವ ಉಪವಾಸದ ನಿಯಮಗಳನ್ನು ಪಾಲಿಸಲಾಗುತ್ತದೆ ಎಂಬುದನ್ನು ತಿಳಿಯೋಣ.

‌ಇವುಗಳನ್ನು ಸೇವಿಸಬಾರದು:

ಮೋಹಿನಿ ಏಕಾದಶಿಯ ಉಪವಾಸವನ್ನು ಆಚರಿಸುವ ಜನರು ಬೆಳ್ಳುಳ್ಳಿ, ಈರುಳ್ಳಿ, ಮಾಂಸಾಹಾರ ಮತ್ತು ಉದ್ದಿನ ಬೇಳೆಯನ್ನು ಮೋಹಿನಿ ಏಕಾದಶಿಯ ಒಂದು ದಿನದ ಮೊದಲು ಅಂದರೆ ದಶಮಿ ತಿಥಿಯಿಂದಲೇ ಸೇವಿಸಬಾರದು ಎಂದು ಹೇಳಲಾಗುತ್ತದೆ.

ಹಲ್ಲನ್ನು ಸ್ವಚ್ಛಗೊಳಿಸುವ ವಿಧಾನ:

‌ ಮೋಹಿನಿ ಏಕಾದಶಿಯ ದಿನದಂದು ಮರಗಳಿಗೆ ನೋವುಂಟು ಮಾಡುವುದು ಸರಿಯಲ್ಲ. ಈ ದಿನ, ಬೆಳಿಗ್ಗೆ ನೇರಳೆ, ಮಾವು ಅಥವಾ ನಿಂಬೆ ಎಲೆಗಳನ್ನು ಅಗಿಯುವ ಮೂಲಕ ನಿಮ್ಮ ಬಾಯಿಯನ್ನು ತೊಳೆಯಬಹುದು. ಅಲ್ಲದೇ, ಹಲ್ಲನ್ನು ಸ್ವಚ್ಛಗೊಳಿಸಿಕೊಳ್ಳುವುದಕ್ಕಾಗಿ ನೀವು ಮರದಿಂದ ಎಲೆಯನ್ನು ಮುರಿಯಬೇಕಾಗಿಲ್ಲ. ಬದಲಾಗಿ ನೆಲದಲ್ಲಿ ಬಿದ್ದ ಎಲೆಗಳನ್ನು ಬಳಸಿಕೊಳ್ಳುವ ಮೂಲಕ ನೀವು ನಿಮ್ಮ ಹಲ್ಲನ್ನು ಸ್ವಚ್ಛಗೊಳಿಸಿಕೊಳ್ಳಬಹುದು.

​ವ್ರತ ತ್ಯಜಿಸುವ ವಿಧಾನ:

‌ಶಾಸ್ತ್ರಗಳ ಪ್ರಕಾರ, ದ್ವಾದಶಿ ತಿಥಿಯಂದು ಏಕಾದಶಿಯ ಉಪವಾಸವನ್ನು ತ್ಯಜಿಸಲಾಗುತ್ತದೆ. ಹಾಗೆಯೇ ದ್ವಾದಶಿ ತಿಥಿಯಂದು ಸೂರ್ಯೋದಯದ ನಂತರವೇ ವ್ರತವನ್ನು ಕೈಬಿಡಬೇಕೆಂಬುದನ್ನು ನೆನಪಿನಲ್ಲಿಟ್ಟುಕೊಳ್ಳಿ. ಶುಕ್ರವಾರ ಮೇ 13 ರಂದು ಬೆಳಗಿನ ಸ್ನಾನ, ಪೂಜೆ ಇತ್ಯಾದಿಗಳ ನಂತರ ಭಗವಾನ್ ವಿಷ್ಣುವನ್ನು ಆರಾಧಿಸಿ ವ್ರತವನ್ನು ತ್ಯಜಿಸಬಹುದು.

​ಪೊರಕೆಯಿಂದ ಮನೆಯನ್ನು ಸ್ವಚ್ಛಗೊಳಿಸದಿರಿ:

‌ಏಕಾದಶಿಯಂದು ಮನೆಯಲ್ಲಿ ಪೊರಕೆಯನ್ನು ಹಿಡಿದು ನೆಲವನ್ನು ಸ್ವಚ್ಛಗೊಳಿಸಬಾರದು ಎಂದು ಹೇಳಲಾಗುತ್ತದೆ. ಏಕೆಂದರೆ ಏಕಾದಶಿ ದಿನದಂದು ನೀವು ಈ ಕೆಲಸಗಳನ್ನು ಮಾಡುವುದರಿಂದ ಇರುವೆ ಇತ್ಯಾದಿ ಸೂಕ್ಷ್ಮಾಣು ಜೀವಿಗಳನ್ನು ನಾಶಪಡಿಸುತ್ತದೆ ಮತ್ತು ನಂತರ ಪಾಪಗಳು ಹೆಚ್ಚಾಗುತ್ತವೆ.

​ಈ ಮಂತ್ರಗಳನ್ನು ಪಠಿಸಿ:

‌ ಮೋಹಿನಿ ಏಕಾದಶಿಯ ದಿನದಂದು, ‘ ಓಂ ನಮೋ ಭಗವತೇ ವಾಸುದೇವಾಯ ನಮಃ’ ಎನ್ನುವ ಮಂತ್ರವನ್ನು ಪಠಿಸುವುದರ ಜೊತೆಗೆ ಭಗವಾನ್ ರಾಮ, ಕೃಷ್ಣ ಮತ್ತು ವಿಷ್ಣುವಿನ ಸಹಸ್ರನಾಮಗಳನ್ನು ಪಠಿಸುವುದು ಸಹ ಬಹಳ ಫಲಪ್ರದವೆಂದು ಪರಿಗಣಿಸಲಾಗುತ್ತದೆ.

​ಇವುಗಳನ್ನು ಸೇವಿಸಬಹುದು:

ಮೋಹಿನಿ ಏಕಾದಶಿಯ ಉಪವಾಸದ ಸಮಯದಲ್ಲಿ ನೀವು ಬಾಳೆಹಣ್ಣು, ಬಾದಾಮಿ, ಮಾವು ಮತ್ತು ದ್ರಾಕ್ಷಿ ಇತ್ಯಾದಿಗಳನ್ನು ಸೇವಿಸಬಹುದು.

​ದಾನ ಮಾಡಿ:

ಮೋಹಿನಿ ಏಕಾದಶಿಯಂದು ನಿಮ್ಮ ಸಾಮರ್ಥ್ಯಕ್ಕೆ ಅನುಗುಣವಾಗಿ ದಾನ ಮಾಡುವುದನ್ನು ಸಹ ಮಂಗಳಕರವೆಂದು ಪರಿಗಣಿಸಲಾಗುತ್ತದೆ. ಅದೇ ಸಮಯದಲ್ಲಿ, ಈ ದಿನದಂದು ಯಾರಾದರೂ ನಿಮಗೆ ಆಹಾರವನ್ನು ನೀಡಿದರೆ ಅದನ್ನು ತೆಗೆದುಕೊಳ್ಳುವುದನ್ನು ಸಹ ನಿಷೇಧಿಸಲಾಗಿದೆ.

ಶಾಸ್ತ್ರಗಳ ಪ್ರಕಾರ, ದ್ವಾದಶಿಯ ದಿನದಂದು, ಒಬ್ಬರ ಸಾಮರ್ಥ್ಯಕ್ಕೆ ಅನುಗುಣವಾಗಿ, ಬ್ರಾಹ್ಮಣರಿಗೆ ಅಥವಾ ಸತ್ಪಾತ್ರರಿಗೆ ದಾನ-ದಕ್ಷಿಣೆ ಮತ್ತು ಸಿಹಿತಿಂಡಿಗಳನ್ನು ನೀಡುವ ಸಂಪ್ರದಾಯವಿದೆ ಎಂಬುದನ್ನು ತಿಳಿದುಕೊಳ್ಳಬೇಕು.