ಕಾಮನಬಿಲ್ಲು
ಮದುವೆ ಹಂದರದಾಗ ಮದುಮಗನಾದಾಗ
ಏಟೊಂದು ಖುಷಿ ಇತ್ತ !
ಏಟೊಂದು ಖುಷಿ ಇತ್ತ ಏನೊಂದು ಖುಷಿ ಇತ್ತ
ಏನೆಂಥ ಖುಷಿ ಇತ್ತ !!
ಖುಷಿಯಿಂದ ಹೇಳು ತಮ್ಮ ಆ ಖುಷಿ ಇತ್ತಿತ್ತ
ಹೋಗೇತಿ ಎತ್ತೆತ್ತ ?
ಕಣ್ಣಾಗ ಮಿಣುಕೇನ ಮಾರ್ಯಾಗ ಬೆಳಕೇನ
ಮಾತ್ನ್ಯಾಗ ಖಡಕೇನ !
ಭಾರಿ ರುಮಾಲೇನ ಬಣ್ಣ ಬಾಸಿಂಗೇನ
ಜರತಾರಿ ದೋತ್ರೇನ !
ನಿಂತಲ್ಲಿ ನಿಲ್ಲಲಿಲ್ಲ ಕುಂತಲ್ಲಿ ಕೂಡಲಿಲ್ಲ
ಜಿಂಕ್ಹಾಂಗ ಜಿಗಿದೆಲ್ಲಾ !
ಕಡಗದ ಕೈಯಾಕಿ ಕೈಹಿಡಿದು ಬಂದಾಗ
ಭೂಮ್ಯಾಗ ಇರಲಿಲ್ಲಾ !
ಬಾಳೀನ ಬವಣೆಯ ಸಾವಿರದಲೆಗಳು
ಮಾರಿಗೆ ಬಡಿದಾಗ
ಸೊರಸೊರಗಿ ಸಣ್ಣಾದಿ ಬಡತನದ ಭೂತವು
ಬೆನ್ನತ್ತಿ ಬಂದಾಗ !
ಸರಸೀರೆ ತರದಾಗ ಮೂದಲಿಸಿ ನುಡಿದಾಗ
ಚಿಂತ್ಯಾಗ ಸೋತೇನ ?
ಕಾಮನಬಿಲ್ಲಿನ ಬಣ್ಣಕ ಮಳ್ಳಾಗಿ
ಹಿಡಿಯಾಕ ಹೋದೇನ ?
ಹಂಗಾಮು ಬಂದಾಗ ಹ್ಯಾಂಗಿತ್ತು ನಿನಚಿತ್ತ
ನವಿಲ್ಹಾಂಗ ಕುಣಿತಿತ್ತ ?
ಸುಟ್ಟ ಗೆಣಸಿನ್ಹಾಂಗ ಸಪ್ಪಗ ನಿನಮಾರಿ
ಕಾಂಬುದು ಈ ಹೊತ್ತ ?
ಋಷಿಯಿಂದ ಹೇಳು ತಮ್ಮ ಆ ಖುಷಿ ಇತ್ತಿತ್ತ
ಹೋಗೇತಿ ಎತ್ತೆತ್ತ ?
ಮದುವೆ ಹಂದರದಾಗ ಮದುಮಗನಾದಾಗ
ಏಟೊಂದು ಖುಷಿ ಇತ್ತ !
ಏಟೊಂದು ಖುಷಿ ಇತ್ತ ಏನೊಂದು ಖುಷಿ ಇತ್ತ
ಏನೆಂಥ ಖುಷಿ ಇತ್ತ !!
ಎನ್.ಶರಣಪ್ಪ ಮೆಟ್ರಿ
(ದ.ರಾ. ಬೇಂದ್ರೆ ಕವನ
ಹಳ್ಳದ ದಂಡ್ಯಾಗ‌ಮೊದಲಿಗೆ ಕಂಡಾಗ ಧಾಟಿಯಲ್ಲಿ)