ಮರಳಿ ಮೂಕನಾದೆ
ನಿನ್ನ ಹೊಗಳಿ ಬರೆದ
ಕವಿತೆಗಿನ್ನು ಕಾಗದದ
ಭಾಗ್ಯ ಬಂದಿಲ್ಲ
ಮಾತಾಡಲೆನ್ನ ಮನಕೆ
ಧೈರ್ಯವೂ ಸಾಲುತಿಲ್ಲ
ನನ್ನೀ ವೇದನೆಯ ನಿನ್ನೆದುರು
ಬಿಚ್ಚಿಡುವ ಪರಿಣತಿಯಿಲ್ಲ
ಕುಂಚ ಹಿಡಿದ ನಾನು
ಕನ್ನಡಿ ಮುಂದೆ ಕುಳಿತ
ನಿನ್ನ ಕಣ್ಣೇಟಿಗೆ ಸೋತಿದ್ದೇನೆ
ತುಟಿಗೆ ರಂಗು ತುಂಬಿದವನು
ಚುಂಬಿಸುವನುಮತಿ
ಇಲ್ಲವೆಂದು ಅರಿತಿದ್ದೇನೆ.
ನನ್ನೆದೆಯ ಕನಸು ಕೊಳ್ಳಲು
ನಿನಗೆ ಧಾವಂತವಿಲ್ಲ
ಮಾರಲು ನನಗೆ ಚತುರತೆಯಿಲ್ಲ
ಬ್ರಶ್ಶು ಕ್ಯಾನ್ವಾಸನ್ನು
ಮುಟ್ಟಬಹುದಷ್ಟೇ
ಚಿತ್ರವೇ ತನ್ನದೆನ್ನಲು ಸಾಧ್ಯವಿಲ್ಲ
ನಿನ್ನ ನಯನಗಳು ಮಾತ್ರ
ಮೋಸಗೊಳಿಸುತ್ತದೆ
ಸನಿಹ ಬರುವಂತೆ ಆಹ್ವಾನಿಸುತ್ತದೆ
ನನ್ನ ಖಾಲಿ ಜೇಬು
ಮೇಕಪ್ಪುಡಬ್ಬಿ ತಡೆಯುತ್ತಿದೆ
ಹೃದಯವಿದು ಹತಾಶೆಯಿಂದ
ಮರಳಿ ಮೂಕವಾಗುತ್ತಿದೆ
ಡಾ.ಭವ್ಯ ಅಶೋಕ ಸಂಪಗಾರ್