ಗಝಲ್
ವರುಷ ದಾಟಿದೆ ಹೃದಯವ ಅರಿಯುತ
ಜಸವ ಪಡೆದೆಯಲ್ಲ ನೀನು|
ಹರುಷ ತುಂಬುತ ಬಯಸಿದ ಮನೆಯ
ಹೊಸ್ತಿಲು ತುಳಿದೆಯಲ್ಲ ನೀನು||
ಋಣದ ಬಂಧವದು ಪ್ರೀತಿಯ ಬೆಸೆದಿದೆ
ಕಳವಳವ ದೂರವಿರಿಸಿದೆ|
ಮೀನಮೇಷ ಎಣಿಸದೆ ಮನದಿ ಧಾವಿಸಿ
ಎದೆಯಲಿ ಕುಣಿದೆಯಲ್ಲ ನೀನು||
ಕನಸಿನ ಕನ್ಯೆಯಾಗಿ ಮೋಹದಲಿ ಅಪ್ಪುತ
ತನುಮನವ ಆವರಿಸಿದೆ|
ನೆನೆಪಿನ ಸುರಿಮಳೆ ಸುರಿಸುತ ಮೋದದೊಳು
ನಯನದಿ ಸೆಳೆದೆಯಲ್ಲ ನೀನು||
ರಾಗದಲಿ ತಾಳವಾಗಿ ಲಯದಿ ಸರಿಗಮ
ಹಾಡುತಲಿ ನಿಂತಿರುವೆ|
ಭೋಗದಲಿ ವೈಭವವ ಚೂತವನ ರಸವನು
ಸವಿಯುತ ಇರುವೆಯಲ್ಲ ನೀನು||
ಹಸೆಮಣೆಯ ಏರುತ ಹೊಸದಾದ ಬಾಳಿಗೆ
ಭಾಗ್ಯವತಿಯಾಗಿ ಬಂದಿರುವೆ|
ಪಿಸುನುಡಿಯ ಅಭಿನವನ ಗಝಲನು ಆಲಿಸಿ
ಮೌನದಲಿ ನಲಿವೆಯಲ್ಲ ನೀನು||
ಶಂಕರಾನಂದ ಹೆಬ್ಬಾಳ
