ಓಗೊಟ್ಟು ಬರುವಳು ಶಾಂಭವಿ
ಮೈಸೂರ ಸಿಲ್ಕ್ ಸೀರೆ ಉಟ್ಟು/
ಮೈಸೂರ ಪಾಕ್ ಬಾಯಲ್ಲಿಟ್ಟು/
ಹೋಗೋಣ ಗೆಳತಿ ಸರ-ಸರನೆ/
ಜಂಬೂಸವಾರಿ ಸಡಗರವ ನೋಡುದಕ/
ನಾಡ ಹಬ್ಬ ದಸರಾ ಚಂದ/
ಮೈಸೂರ ಅರಮನೆ ಏನ ಚಂದ/
ಆನೆಯ ಅಂಬಾರಿ ಮ್ಯಾಲೆ ದೇವಿಯು/
ಚಾಮುಂಡಿ ತಾಯಿಯು ಕುಳಿತಿಹಳು/
ಒಂಬತ್ತು ದಿವಸ ನಾವು ಮುತೈದೆಯರು ಎಲ್ಲರೂ/
ಬನ್ನಿಗಿಡವ ಪೂಜೆ ಮಾಡಿ ಉಡಿಯ ತುಂಬೋಣ/
ಆದಿಶಕ್ತಿಯಲ್ಲಿ ನಾವು ವರವನು ಕೇಳೋಣ/
ಘಟ್ಟ ಹಾಕಿ,ದೀಪಾ ಹಚ್ಚಿ ಉಪವಾಸ ಮಾಡೋಣ/
ಆಯುಧ ಪೂಜೆ ಮಾಡೋಣ ಗೆಳತಿ/
ಮಾವಿನ ತೋರಣ ಕಟ್ಟೋಣ ಗೆಳತಿ/
ಚಂಡು ಹೂ,ತರ-ತರದ ಹೂವಿಂದ ಶೃಂಗಾರ ಮಾಡೋಣ/
ಸಿಹಿ ಅಡುಗೆ ಮಾಡಿ ನಾವು ಎಡೆಯ ಹಿಡಿಯೋಣ/
ಬನ್ನಿ ಮುಡದ ಬಂದರು ಗೆಳತಿ/
ಮೈಸೂರ ಪೇಟ ಧರಿಸ್ಯಾರ ಗೆಳತಿ/
ದೇವಿ ಪುರಾಣ ಕೇಳಿ ನಾವು ಪಾವನರಾಗೋಣ/
ಬನ್ನಿ ಕೊಟ್ಟು ಬಂಗಾರದಂಗ ಬಾಳೋಣರಿ./
ಅಂಬೆ ಎಂಬ ಕೂಗಿಗೆ ಓಗೊಟ್ಟು ಬರುವಳು ಶಾಂಭವಿದೇವಿ/
ಬಂದ ಕಷ್ಟಗಳನ್ನೆಲ್ಲಾ ಸರಿಸಿ ಹರಸುವಳು ಕಾಳಿಕಾದೇವಿ/
ದುಷ್ಟರನು ಸಂಹರಿಸಿ,ಶಿಷ್ಟರನು ರಕ್ಷಿಸುವಳು ರುಂಡಮಾಲಿನಿದೇವಿ/
ನವರಾತ್ರಿ ವೈಭವದ ಸಿರಿದೇವಿ,ಎಲ್ಲರನು ರಕ್ಷಿಸುವಳು ಉಧೋ..ಉಧೋ..ಎಲ್ಲಮ್ಮದೇವಿ./
ಶ್ರೀಮತಿ-ಕಸ್ತೂರಿ ಎಸ್ ಬಿ.