ಶರಣು ಬೆನಕನೆ ಶತಶತ ವಂದನೆ
ಪಾರ್ವತಿ ನಂದನ ಮೂಷಕ ವಾಹನ
ಸಿದ್ಧಿ ವಿನಾಯಕ ವಿದ್ಯಾ ಪ್ರದಾಯಕ
ವಿಘ್ನ ನಿವಾರಕ ಸಂಕಷ್ಟ ಹಾರಕ
ಸಾಧು ವಂದಿತ ತ್ರಿಜಗ ಪೂಜಿತ
ಮೊರದಗಲದ ಕಿವಿಯವನೆ ಭಕ್ತರ ಪೊರೆವನೆ
ಪ್ರಣವಸ್ವರೂಪನೆ ಮುನಿಜನ ಪ್ರಿಯನೆ
ಅನುದಿನವು ನಿನ್ನ ಸ್ಮರಣೆ ಭಕ್ತಿಯ ಆರಾಧನೆ
ಆದಿಯಲಿ ನಿನ್ನ ಅರ್ಚನೆ ಸಕಲ ಸುರರಿಂಗೆ ಮಾಧವನೆ
ಕರುಣಾಸಾಗರ ಲಂಬೋದರ ಲಕುಮಿಕರ
ಪಾಶಾಂಕುಶಧರ ನಿನ್ನಯ ಶಕ್ತಿ ಅಪಾರ
ಮಂಗಳ ಮೂರುತಿ ವಿದ್ಯಾ ಅಧಿಪತಿ
ತ್ರಿಲೋಕದಲಿ ತುಂಬಿದೆ ನಿನ್ನಯ ಕೀರುತಿ
ಭಕ್ತ ವತ್ಸಲ ನಿನಗೆ ಭಾವಾರ್ಚನೆ ದೂಮ್ರವರ್ಣನೆ ನಿನಗೆ ದೀಪಾರ್ಚನೆ
ಗಂಗಾಧರಪುತ್ರ ನಿನಗೆ ಗಂಧಾರ್ಚನೆ ಪಾರ್ವತಿ ಸುತನೆ ನಿನಗೆ ಪುಷ್ಪಾರ್ಚನೆ
ಮಹಿಮಾನ್ವಿತನೆ ನಿನಗೆ ಸವಿ ಮೋದಕ ನಿವೇದನೆ
ವಿವೇಕದಾತನೆ ಶರಣು ಬೆನಕನೆ ನಿನಗೆ ಶತ ಶತ ವಂದನೆ
ಬರುವುದು ಭಾದ್ರಪದ ಶುಕ್ಲ ಚೌತಿಯಂದು ನಿನ್ನ ಹಬ್ಬ
ತರುವುದು ನಾಡಿಗೆಲ್ಲ ಹೊಸ ಹರ್ಷ ಪ್ರತಿ ವರ್ಷ
ಶರಣು ಸಜ್ಜನರ ಮೊರೆ ಕೇಳಿ ಹರಸು ಹರುಷವ
ಹರಿಸಿ ಮರೆಸು ಬವಣೆಗಳನ್ನ ಅರಳಿಸು ಭಾವನೆಗಳನ್ನ
ಜಯಶ್ರೀ ಜೆ. ಅಬ್ಬಿಗೇರಿ, ಬೆಳಗಾವಿ