ಮುದ್ದು ಕೃಷ್ಣ…

ಬಾರೋ ನನ್ನ ಬಾಳ ಕುಸುಮ

ಮಡಿಲ ತುಂಬೋ ಮುದ್ದು ಕೃಷ್ಣ//

ನಿನ್ನ ನಡೆಯಾ, ತೊದಲು ನುಡಿಯಾ
ಮುಗುಳು ನಗೆಯಾ, ಮುಗ್ಧ ಅಳುವಾ
ನೋಡುತಿರಲು ಮನವೇ ಮರುಳ//

ನಿನ್ನ ಕೆನ್ನೆಯಂದ ಮುಂಗುರುಳ ಚೆಂದ
ಹವಳದುಟಿಗಳ ಮೂಕ ಬಂಧ
ಮುತ್ತನಿಟ್ಟರೆ ಮೈಮನಗಳು ಹದುಳ//

ಕರುಳ ಬಳ್ಳಿ ನೀ ಚೆಲುವ ಚೆಂದುಳ್ಳಿ
ಕೆನ್ನೆಗುಳಿಯು ಪದ್ಮನಾಭನಂತೆ
ಪವಡಿಸುವ ಕಂದ ನಾ ಪರವಶಳು//

ಕೃಷ್ಣನಾಟ ,ಶಿವನ ನೋಟ, ಭರತನ ಕೂಟ
ಸೃಷ್ಟಿಕರ್ತನ ಬೆಡಗ ನೋಡುತಿರೆ
ಮುಚ್ಚಲೆಂಗ ನನ್ನ ಕಣ್ಣುಗಳ//

ಮಗ್ಗುಲು ಮಲ್ಲಿಗೆ, ಮನೆಯ ಸಂಪಿಗೆ,
ಬಳಗದ ಮಂದಾರವೇ ನೀ
ಕಂದ ನಾ ಧನ್ಯ ನಿನ್ನೊಳಗ//

*ಅನ್ನಪೂರ್ಣ ಹಿರೇಮಠ