ತುಂತುರು ಮಳೆ
ವರುಣನಾಗಮನದಿ ಭುವಿಗೆ ಕಳೆ
ಬಾಣಂಚಿನ ಮಡಿಲಿನಿಂದ ಜಾರಿ
ಭೂಮಾತೆಯ ಒಡಲ ಸೇರಿ
ತಂಪೆರಗಿತು ಸುತ್ತಲೂ ಹರಡಿ
ಮೈ ಜಾಡಿಸುವ ಗುಬ್ಬಚ್ಚಿಗಳು
ಗರಿಗೆದರುವ ಸುಂದರ ನವಿಲುಗಳು
ಎಲೆಗಳಿಂದ ಜಾರುವ ನೀರ ಬಿಂದುಗಳು
ಆ ಬಿಂದುಗಳ ಹೊತ್ತು ನಿಂತ ಸುಮಗಳು
ತಂಪಾದ ಗಾಳಿಯ ಇಂಪಿನ ಒಡನಾಟ
ಗಾಳಿಯಲ್ಲಿ ತುಂತುರು ಹನಿಗಳ ಚೆಲ್ಲಾಟ
ರೋಮಾಂಚನಗೊಳಿಸುವ ವಾತಾವರಣ
ಮುಂಗಾರಿನ ಮಳೆಯ ಈ ಸಂಚಲನ
ಸದ್ದು ಗದ್ದಲಗಳಿಗೆ ಕೊಂಚ ವಿರಾಮ
ಸಂಚಾರ ವಿಹಾರಕ್ಕೆ ಹಾಕುವ ಕಡಿವಾಣ
ತುಂತುರು ಮಳೆಯ ಆಸ್ವಾದಿಸೋಣ
ಮಳೆ ನಿಂತು ಹೋದ ಮೇಲೆ ಮತ್ತದೇ ಪಯಣ
ಶ್ರೀಮತಿ ಜ್ಯೋತಿ ಕೋಟಗಿ ಬೈಲಹೊಂಗಲ ಬಿ ಆರ್ ಪಿ ಚ. ಕಿತ್ತೂರು