ನಮಾಮಿ ನಾಗದೇವ
ಅಣ್ಣನ ಕರೆಯದು ಬಂದಿತು ಹಬ್ಬಕೆ
ತಂದಿತು ಮನದಲಿ ಬಗೆಬಗೆ ಬಯಕೆ
ಹೊರಡಲು ಹರುಷದಿ ತಯಾರಿ ನಡೆದಿದೆ
ರಾಯರ ಮುಖವದು ಬಾಡಿಯೇ ಹೋಗಿದೆ//
ತವರಿಗೆ ಹೊರಟಿಹ ಇವಳಿಗದೋ ಸಡಗರ
ಅವನಲಿ ನುಡಿದಿದೆ ವಿರಹದ ಅಪಸ್ವರ
ವಾಹನ ಬಂದಿತದು ಬಾಗಿಲ ಬಳಿಯಲಿ
ಅವನೂ ನಡೆದನು ಮಡದಿಯ ಜೊತೆಯಲಿ//
ಸಂಭ್ರಮದಿಂದ ನಡೆಯಿತು ಮನೆಯಲಿ ಹಬ್ಬ
ಕ್ಷೀರಾಭಿಷೇಕವ ಮಾಡಿಸಿಕೊಂಡನು ನಾಗಪ್ಪಾ
ಸರತಿಯ ಸಾಲಲಿ ಬಂದರು ಎಲ್ಲರೂ
ತನಿಯನು ಎರೆದು ಪಾವನರಾದರು//
ಜೋಕಾಲಿ ಜೀಕುತ ಕೊಬ್ಬರಿ ಲಾಡು ತಿಂದಿಹರು
ನಾನಾ ನೀನಾ ಎನ್ನುತಲಿ ಸ್ಪರ್ಧೆಗೆ ಇಳಿದಿಹರು
ಗೆಲುವಿಗೆ ನಾನಾ ಸಾಹಸವ ಮಾಡಿಹರು
ಗೆದ್ದವರು ಬೀಗುತ ಮುದದಿಂ ಸಾಗಿಹರು//
ಸೋಲು ಗೆಲವು ಜೊತೆ ಜೊತೆಗೆ ಇರಲಿ
ಜೀವನ ನೌಕೆ ಹೀಗೆ ಸಾಗುತಲಿರಲಿ
ತೇಲಿಸು ನೀನು ಹರುಷದ ಕಡಲಲಿ
ಆಸರೆ ನೀಡು ನಿನ್ನಯ ಮಡಿಲಲಿ//
ನಮಾಮಿ ನಮಾಮಿ ನಾಗ ದೇವಗೆ
ಹರಿಹರರ ಪ್ರೀತಿಗೆ ಪಾತ್ರನಾದವಗೆ
ಸಮುದ್ರ ಮಂಥನದ ಪಾತ್ರಧಾರಿಗೆ
ಗಣಪನ ಉದರಕೆ ಆಸರೆಯಾದವಗೆ//
ಶ್ರೀಮತಿ ಜ್ಯೋತಿ ಕೋಟಗಿ ಬೈಲಹೊಂಗಲ
ಬಿ ಆರ್ ಪಿ . ಚ ಕಿತ್ತೂರು