ನಾಜೂಕು ನಜರು
ನಿನ್ನ ಆ ಸೌಂದರ್ಯವ
ಕಂಡ ಈ ನನ್ನ
ನಾಜೂಕು ನಜರಿಗೂ
ಜೀಕುವ ಭಾವಲಹರಿಗೂ
ಸಲ್ಲದ ಪೈಪೋಟಿಯೊಂದು
ಸದ್ದಿಲ್ಲದೆ ಅಲೆಯ
ಎಬ್ಬಿಸಿರಲು, ಆ ಸಲ್ಲಾಪವ
ಲೇಖನಿಗೆ ವರ್ಗಾಯಿಸುವುದೋ
ಬೇಡವೋ ಎಂಬ
ಹೊಸಗೊಂದಲದ
ಗೂಡೊಂದು ಸದ್ದಮಾಡುತ್ತಲೇ
ತನ್ನೆಡೆಗೆ ನನ್ನನ್ನು ಸೆಳೆಯುತಿದೆ…
ಸೆಳೆವ ಗೊಂದಲದ
ಗೂಡೆಡೆಗೆ ಹೋಗಲೋ
ಅದಾಗಲೇ ಸೆಳೆದ
ಕಾವ್ಯದ ಅಮಲಿನಲ್ಲಿ
ಮುಳುಗಲೋ,
ಮತ್ತೊಂದು ಗೊಂದಲ
ಮರಿ ಹಾಕಿ ನನ್ನೆಡೆ ನೋಡಿ
ಮುಸಿನಗಲು, ಆ ನಿನ್ನ ಸೆಳೆದ
ಸೌಂದರ್ಯ ನನ್ನಿಂದ
ದೂರ ಸಾಗಿಯಾಗಿತ್ತು…
ನನ್ನೆಡೆ ಕಿರುನಗೆಯ ಬೀರಿ
ತುಸುದೂರ ನಿಂತಿದ್ದ
ಕವಿತೆಗೆ ನಾನು ಸೋತಾಗಿತ್ತು…
ಈ ಕಾವ್ಯಾಗ್ನಿಯ ಬೆರಳುಗಳು
ಕವಿತೆಯ ತಕಧಿಮಿತಕ್ಕೆ
ಸಿದ್ಧವಾಗಿ ಕಾವ್ಯಕ್ಕೆ
ಮುನ್ನುಡಿಯ ಬರೆದಾಗಿತ್ತು…
ಕಾವ್ಯಾಗ್ನಿ 🔥
ತಾರಾ ಸಂತೋಷ್ ಮೇರವಾಡೆ ಗಂಗಾವತಿ